Far Cry Serialı Gəlir!

Ubisoft şirkətinin rəsmi saytında qısa müddət ərzində görünən, sonra isə silinən bir açıqlamaya görə, məşhur Far Cry video oyun seriyası televiziya ekranlarına gəlir. Bu gözlənilməz xəbər oyun həvəskarları arasında böyük maraq doğurub.

Disney şirkətinə məxsus FX kanalı tərəfindən istehsal olunacaq serial antologiya formatında olacaq. Bu o deməkdir ki, hər mövsüm fərqli hekayə və personajlarla izləyicilərin qarşısına çıxacaq. Serialın video oyun kainatından ilham alıb-almayacağı hələlik məlum deyil.

Layihənin arxasında “It’s Always Sunny in Philadelphia” serialı ilə tanınan Rob Mac və “Fargo”nun yaradıcısı Noah Hawley kimi tanınmış simalar dayanır. Rob Mac-ın serialın ilk mövsümündə rol alacağı da açıqlanıb.

Hazırda serialın yayım tarixi, rəsmi elanı və digər detallar açıqlanmayıb. Ancaq “The Last of Us”, “Fallout”, “Mortal Kombat” və “Arcane” kimi uğurlu video oyun ekranlaşdırmalarından sonra Far Cry-ın da eyni müvəffəqiyyəti əldə edəcəyi gözlənilir. Serialın hansı platformda yayımlanacağı da məlum deyil, ancaq FX-in Disney-ə məxsusluğu və hazırkı yayım trendləri nəzərə alınaraq, Disney+-da yayımlanması ehtimalı yüksəkdir.

Geniş azarkeş kütləsinə sahib olan Far Cry-ın televiziya aləminə təsiri maraqla gözlənilir. Bu layihə haqqında fikirlərinizi bizimlə bölüşməyi unutmayın!