FTB, “Archive.is” Saytının Sahibini Tapmaq Üçün Domen Qeydiyyatçısına Məcburi Order Göndərdi

Federal Təhqiqat Bürosu (FTB), tanınmış veb arxivləşdirmə xidməti olan Archive.today və onun Archive.is, həmçinin Archive.ph kimi fəaliyyət göstərən çoxsaylı güzgü saytlarının sahibinin kimliyini müəəyyən etməyə çalışır. 404 Media-nın yaydığı məlumata görə, FTB bu məqsədlə veb domenlərin qeydiyyatçısı olan "Tucows" şirkətinə məcburi order göndərib.

Bu sənəd hüquq-mühafizə orqanlarının anonim veb resursun arxasındakı şəxsi tapmaq istiqamətində atdığı ciddi bir addımdır. Həmin orderin surəti Archive.today xidmətinin rəsmi X (əvvəllər Twitter) hesabında dərc edilib. 30 oktyabr tarixində Tucows şirkətinə yollanan bu rəsmi məktubda FTB Archive.today domeni ilə əlaqəli bütün müştəri və ya abunəçinin adını, xidmət ünvanını və ödəniş ünvanını tələb edir.

FTB bu sorğu ilə arxivləşdirmə saytının fəaliyyətinə cavabdeh olan şəxsi tam müəyyənləşdirməyi hədəfləyir. Agentlik istintaqı təkcə Archive.today ilə məhdudlaşdırmır, eyni zamanda istifadəçilərin veb səhifələri yaddaşda saxlamaq üçün istifadə etdiyi Archive.is və Archive.ph kimi alternativ adlarla fəaliyyət göstərən bütün güzgü domenlərinin də sahiblərini tapmağa çalışır. Tucows kimi domen qeydiyyatçıları isə hüquqi tələb olduğu təqdirdə, müştəri məlumatlarını təqdim etmək məcburiyyətində qalırlar.