Google, Samsung ilə əməkdaşlığı dayandırır!

Google şirkəti özünün Tensor prosessor seriyasının istehsalında köklü dəyişiklik edərək, Samsung Foundry ilə əməkdaşlığını dayandırdı. Şirkət, Pixel 10 modelindən başlayaraq, beş nəsil üçün çip istehsalını dünyanın ən böyük yarımkeçirici istehsalçılarından biri olan TSMC-yə həvalə edəcək. Bu qərar, Samsungun 3nm GAA istehsal prosesindəki səmərəlilik problemlərindən sonra qəbul edilib.

Pixel 6-dan başlayaraq Tensor G1-dən Tensor G4-ə qədər olan prosessorların istehsalını Samsung Foundry həyata keçirib. Lakin, istehsal prosesi zamanı texniki problemlər və aşağı çip məhsuldarlığı şirkəti yol xəritəsini yenidən qurmağa məcbur edib. Tensor G5 çipindən başlayacaq yeni dövrdə prosessorlar TSMC-nin 3nm "N3P" prosesi ilə istehsal olunacaq. Tensor G5-in ilin sonunda təqdim olunması planlaşdırılan Pixel 10 seriyasında ilk dəfə istifadə olunması gözlənilir.

Yeni Tensor G5 çipi, artırılmış performansdan daha çox enerji səmərəliyinə yönəlib. Google-un bu çiplə istifadəçi təcrübəsini daha balanslı etməyi hədəflədiyi bildirilir. Performansda əsas sıçrayışın növbəti nəsil Tensor G6 ilə baş verməsi gözlənilir. Digər tərəfdən, Google-un geyə bilən qurğular üçün xüsusi bir Tensor çipi üzərində işlədiyi barədə də məlumatlar var. Lakin, bu çipin hansı şirkət tərəfindən istehsal olunacağı barədə hələlik heç bir açıqlama verilməyib.

Samsung tərəfdən isə diqqət hazırda Exynos 2600 prosessoruna yönəlib. Şirkətin yeni çipi 2nm GAA prosesi ilə hazırladığı və Galaxy S26 seriyasında istifadə etməyi planlaşdırdığı məlumdur. Əgər Exynos 2600 gözləntiləri doğruldursa, Samsung-un yarımkeçirici istehsalında itirdiyi müştəri portfelini geri qazanması mümkündür.