İlon Maskın "Koloss" superkompüteri Tesla Meqapacklarla işləyir

İlon Maskın süni intellekt şirkəti xAI, ABŞ-da qurduğu "Koloss" superkompüterini enerji ilə təmin etmək üçün Tesla Meqapack batareyalarından istifadəyə başlayıb. Süni intellekt modellərinin təlimi və X sosial media platforması üçün hazırlanan bu kompüter, davamlı enerji infrastrukturu ilə tam gücü ilə fəaliyyətə başlayıb.

Tesla Meqapacklar, "Koloss" superkompüterini enerji ilə təmin edir. Quraşdırma bir ildən az müddətdə tam işlək vəziyyətə gətirilib. Hazırda 150 MVt gücündə transformator mərkəzinə qoşulmuş sistem, 150 MVt saat enerji saxlama qabiliyyətinə malik Tesla Meqapack qurğuları ilə dəstəklənir. Litium-ion texnologiyasından istifadə edən bu batareya sistemləri, enerji kəsintiləri və yüksək enerji istehlakı dövrlərində sistemin fasiləsiz işləməsinə kömək edir. Hər Meqapack təxminən 3900 kVt saat enerji saxlaya bilir.

"Koloss"un tikintisi zamanı müvəqqəti olaraq istifadə olunan təbii qaz turbinləri artıq elektrik şəbəkəsi və batareya sistemləri ilə əvəz olunmağa başlayıb. Turbinlərin əhəmiyyətli bir hissəsi istismardan çıxarılıb, qalanları isə qurğunun ikinci mərhələsində tamamlanacaq yeni transformator mərkəzi ilə birlikdə ehtiyat məqsədləri üçün saxlanılacaq.

"Koloss" superkompüteri iyul 2024-cü ildə 100 min Nvidia H100 GPU qurğusu ilə işə başlayıb. Fevral 2025-ci ildən etibarən bu say iki dəfə artırılıb. İlon Maskın uzunmüddətli hədəfi bu sistemin 1 milyon GPU-ya çatmasıdır.