Intel və Microsoft 18A istehsal prosesi üzrə razılaşma imzaladı

İntel, gələcək nəsil 18A istehsal prosesi üçün Microsoft ilə əsaslı razılaşma imzalayıb. ABŞ-lı çip istehsalçısı bu qabaqcıl texnologiya üzrə ilk əhəmiyyətli müqaviləsini rəsmiləşdirib. Microsoft-dan sonra Google və Nvidia kimi digər texnologiya nəhənglərinin də Intel ilə danışıqlar apardığı bildirilir.

18A istehsal prosesi, Intel-in TSMC ilə rəqabətdə mövqeyini gücləndirməsi üçün strateji əhəmiyyət daşıyır. Şirkət bu prosesi bir neçə ay əvvəl təşkil etdiyi “Direct Connect 2025” tədbirində təqdim etmişdi. Qeyd olunur ki, 18A, SRAM sıxlığı və enerji səmərəliliyi baxımından TSMC-nin 2nm (N2) prosesi ilə birbaşa rəqabət apara biləcək səviyyədədir.

Razılaşmadan sonra Intel, 18A prosesi üçün müştəri portfelini genişləndirməyə başlayıb. Yeni baş direktor Lip-Bu Tan-ın addımları Intel-in strateji hərəkətində təsirli olub. Tan-ın rəhbərliyi altında şirkət istehsal texnologiyaları, qabaqcıl çip paketləmə həlləri və avtomatlaşdırılmış yarımkeçirici dizaynlarına diqqət yetirib. Bundan əlavə, əvvəllər tətbiq olunan "IDM 2.0" strategiyasından imtina edilib və daha çevik və rəqabətli bir quruluş qəbul olunub. TSMC-nin tam istehsal gücü də Intel-ə marağı artıran amillərdəndir. Bir çox texnologiya şirkəti istehsal gücü məhdudiyyətləri ilə üzləşmədən layihələrini həyata keçirə biləcək alternativ təchizatçılar axtarır.