Kia-nın Avropada istehsal olunan ilk elektrikli avtomobili: EV4!

Elektrikli avtomobillər getdikcə daha çox populyarlıq qazanır və avtomobil nəhəngləri bu sahədə bazar paylarını genişləndirmək üçün səylərini artırırlar. Kia, Slovakiyadakı zavodunda çərşənbə günü Avropada istehsal olunan ilk elektrikli avtomobilinin istehsalına başladı. Bu, yeni elektrikli SUV-lar, minik avtomobilləri və yük maşınlarını əhatə edən əhəmiyyətli bir təşəbbüsdür.

Kia, EV4 ilə ilk elektrikli heçbekini təqdim edir. Bu addımla avtomobil nəhəngi heçbekləri yenidən bazara çıxarmaq istiqamətində addım atmışdır. Kia EV4 həm brendin ilk elektrikli heçbeki, həm də Avropada istehsal olunan ilk elektrikli avtomobilidir. Bu, Kia-nın Avropa yollarında üstünlüyünü daha da artırmasına və bazar payını genişləndirməsinə imkan verəcəkdir.

Kia Avropa şöbəsinin baş direktoru Mark Hedrix çərşənbə günü bildirib: “İstehsalın başlanması bizim üçün çox böyük bir mərhələdir. Avqustun 20-dən etibarən Slovakiya hibrid və daxili yanma mühərrikli modellərə əlavə olaraq tam elektrikli avtomobillər də istehsal edəcəkdir.” Zavod artıq Kia-nın ümumi qlobal istehsalının təxminən 1%-ni təşkil edir. Kia elektrikli avtomobil istehsalı üçün, yeni batareya konveyerini də əhatə edən, 108 milyon avro investisiya yatırıb.

İstehsal olunan avtomobilin xüsusiyyətlərinə gəldikdə, EV4 heçbeki iki fərqli batareya variantı ilə təqdim olunur: 58.3 kWh və ya 81.4 kWh. Bu variantlar WLTP-yə görə 629 kilometrə qədər məsafə təklif edir. Həmçinin V2L (Avtomobil-Cihaz Şarjı) və V2G (Avtomobil-Şəbəkə Şarjı) kimi yeni funksiyaları da təklif edir. Hyundai-nin E-GMP platformasına əsaslanan EV4 heçbekinin ölçüləri Kia Xceed ilə demək olar ki, eynidir: uzunluğu 4430 mm, eni 1860 mm və hündürlüyü 1485 mm. Böyük Britaniyada giriş səviyyəli EV4 Air Standard Range modelinin qiyməti təxminən 47.700 dollara, daha uzun məsafəli modelin qiyməti isə təxminən 51.700 dollara bərabərdir.