Las Veqasda Teslanın Partlayışı: Terror Aktı mı?

ABŞ-da, Las-Veqasdakı Trump Beynəlxalq Otelinin qarşısında baş verən hadisə ölkəni sarsıtdı. Tesla Cybertruck-un partlaması nəticəsində bir nəfər ölüb, yeddi nəfər yaralanıb. İlkin araşdırmalar göstərir ki, partlayış avtomobilin özündən deyil, içərisində olan atəşfəşanlıq vasitələrindən və düşərgə yanacağı qablarından qaynaqlanıb.

Tesla CEO-su Elon Mask qısa bir açıqlama ilə partlayışın avtomobilin özündən deyil, atəşfəşanlıq vasitələrindən qaynaqlandığını təsdiqləyib. Hətta Cybertruck-un dizaynının partlayışın təsirini minimuma endirməsini vurğulayaraq, hücumçuların səhv maşını seçdiklərini bildirib. Otelin şüşə qapılarının belə salamat qalması avtomobilin möhkəmliyini bir daha təsdiqləyib.

Hadisənin Trump otelinin qarşısında baş verməsi əlavə marağa səbəb olub. Bilindiyi kimi, Elon Mask və Donald Trump arasında yaxın münasibətlər mövcuddur və Mask, seçki dövründə Trump-a böyük maliyyə və mənəvi dəstək verərək gündəmə gəlmişdi.

Lakin hadisənin təkcə bu detallarla məhdudlaşmadığı düşünülür. Yeni Orleanda baş verən digər bir hadisə ilə əlaqələndirilmə ehtimalı var. Orada, Shamsud-Din Cəbbar adlı bir şəxs Ford F-150 Lightning yük maşını ilə Yeni il gecəsi izdihamın içərisinə girərək 15 nəfəri öldürüb, 35 nəfəri yaralayıb. Maraqlıdır ki, hər iki hücumda istifadə olunan avtomobillərin Turo adlı bir xidmət vasitəsi ilə kirayəyə götürüldüyü bildirilir. Bu hadisə, ölkədə təhlükəsizlik narahatlığı yaradır və geniş miqyaslı araşdırma tələb edir.