Maskın dəlilikləri: X-də media qurumlarının əsassız bloklanması

Ötən həftə sonu Hindistan istifadəçiləri X (əvvəlki Twitter) platformasında iki mühüm Reuters hesabına daxil ola bilmədilər. Platformda 25 milyon izləyicisi olan əsas Reuters hesabı və Reuters World hesabı şənbə axşamı Hindistanda bloklandı. Lakin, bloklama bir gün sonra qaldırıldı və hesablar bərpa olundu. Hindistan istifadəçiləri @Reuters hesabına daxil olmağa çalışdıqda "Bu hesab Hindistan hökumətinin qanuni tələbi ilə bloklanıb" mesajı ilə qarşılaşdılar. Reuters bəyanatında X ilə vəziyyətin həlli üçün çalışdıqlarını bildirdi.

May ayında X-dən sosial media komandasına bəzi məzmunun Hindistan hökumətinin tələbi ilə məhdudlaşdırıldığı barədə bildiriş gəldiyi, lakin hansı qurumun tələb etdiyi və hansı məzmunun hədəf alındığı aydınlaşdırılmadığı bildirilir. Hindistan hökumətinin bəyanatına görə isə bloklama rəsmi bir tələb əsasında deyil. Hökumət sözçüsü "Reuters hesabının bloklanması üçün Hindistan hökuməti tərəfindən heç bir tələb olmayıb. Bu məsələni X ilə birlikdə həll edirik" dedi.

X əvvəllər məzmun silinməsi və hesab bloklanması tələbləri ilə bağlı Hindistan hökuməti ilə gərginlik yaşamışdı. Şirkət mart ayında Hindistan hökuməti tərəfindən yaradılan bir veb saytın dövlət məmurlarına məzmunu silmək üçün məhdudiyyətsiz səlahiyyət verdiyini, bunun qanunsuz senzura mexanizmi təşkil etdiyini iddia edərək məhkəməyə müraciət etmişdi. Hindistan hökuməti isə həmin saytın yalnız internetdə zərərli məzmunu bildirmək üçün istifadə olunduğunu bildirdi. Keçən il Braziliyada da Ali Məhkəmə ilə mübahisədən sonra platformanın müvəqqəti olaraq bloklanması ilə oxşar bir proses yaşandı. Son hadisə X-in məzmun nəzarəti və giriş siyasəti ilə bağlı dünya hökumətləri ilə davam edən mübahisələrini bir daha üzə çıxardı.

Elon Maskın qərarları bir çox sual doğurur və bu, həm də Azərbaycan kimi ölkələr üçün də bir xəbərdarlıqdır.