Meta ilə OpenAI arasında qızğın rəqabət

Süni intellekt sahəsindəki rəqabət artıq texnoloji yeniliklərin hüdudlarını aşaraq, istedadlı kadrlar uğrunda amansız mübarizəyə çevrilib. Meta və OpenAI arasında baş verən bu yeni "müharibə"də əsas mövzu yüksək səviyyəli işçilərin transferidir.

Meta şirkətinin baş texnologiya zabiti Andrew Bosworth, daxili iclasda OpenAI-ın baş direktoru Sam Altmanın iddialarına cavab olaraq diqqət çəkən açıqlamalar verib. Altman son podcast yayımında Meta-nın OpenAI-dan bəzi işçiləri cəlb etmək üçün hər birinə 100 milyon dollara qədər təklif etdiyini iddia edib. Lakin Bosworth bu iddiaları qəti şəkildə təkzib edərək, "Sam dürüst davranmır" deyə bildirib.

Məlumata görə, sözügedən təkliflər Altmanın qeyd etdiyi kimi birbaşa "imza bonusu"nu deyil, daha əhatəli və uzunmüddətli əmək haqqı + səhm paketlərini əhatə edir. Bosworth, "O, sanki biz bunu hər bir insan üçün edirikmiş kimi danışır... Bazar istidir, amma o qədər də isti deyil" deyərək, iddiaların şişirdildiyini bildirib. Bosworth həmçinin, OpenAI-dan Meta-ya keçən bəzi adların mediada yer aldığını, lakin ictimaiyyətə açıqlanmayan digər mühüm transferlərin də olduğunu söyləyib. Baş texnologiya zabiti Altmanın "şişirtmə meylinin" bu kontekstdə qəsdən tətbiq oluna biləcək bir strategiya olduğunu bildirərək, "Onun niyə bunu etdiyini çox yaxşı bilirəm. Çünki biz OpenAI-dan istedadlı insanları cəlb edə bilirik və o, bundan razı deyil" deyib.

Son məlumata görə, Meta-nın superintellekt inkişaf komandasına qoşulan son adlar arasında OpenAI-ın Sürix ofisinin təsisçiləri Lucas Beyer, Alexander Kolesnikov və Xiaohua Zhai da var. Bu transferlər şirkətin süni intellekt sahəsində insan resurslarını sürətlə gücləndirdiyini göstərir.