"Netflix-in yeni elmi-fantastika serialı böyük uğur qazanıb!"

Aprelin 30-da Netflix-də yayımlanan Argentinanın elmi-fantastika serialı "Eternaut" (Sonsuz Səyyah) izləyicilərdən böyük maraqla qarşılanıb. Hektor German Oesterheldin eyniadlı komik kitabından ekranlaşdırılan serial, ilk həftəsində platformanın ən çox izlənilən istehsalatlarından biri olub. Rotten Tomatoes məlumatlarına görə, serial tənqidçilərdən 93%, izləyicilərdən isə 96% reytinq qazanıb.

Seriala olan maraq Netflix-i ikinci mövsümü tez bir zamanda təsdiqləməyə vadar edib. Şirkətin açıqlamasına görə, "Eternaut"un ikinci mövsümünün çəkilişləri rəsmi olaraq başlayıb. Netflix direktoru Fransisko Ramos verdiyi müsahibədə ikinci mövsümün serialın final mövsümü olacağını bildirib. Ramos əlavə edib ki, bu mövsümdə hekayəni tamamlayacaqlar. Birinci mövsümdə olduğu kimi, rejissor kreslosunda Bruno Staqnaro əyləşəcək.

Orijinal komik kitab 1950-ci illərin sonlarında nəşr edilib və Latın Amerikası ədəbiyyatında kult əsərə çevrilib. Hekayə milyonlarla insanın həyatına son qoyan sirli qar fırtınasından sonra baş verir. Bu fəlakətin səbəbinin dünyanı işğal edən əcnəbilər olduğu düşünülür. Kiçik bir qrup sağ qalmaq üçün mübarizə aparır. Komik kitab yalnız elmi-fantastika elementlərinə görə deyil, həm də güclü siyasi mesajlarına görə tanınır. "Eternaut"un ikinci və final mövsümünün yayım tarixi hələ açıqlanmayıb. Lakin, istehsalın başladığı təsdiqlənib.