Redmi K80 Ultra-nın "ürək"i açıqlandı!

Noyabrın 27-də satışa çıxarılan Redmi K80 seriyası istifadəçilərdən böyük rəğbət qazanıb. Telefonlar ilk gün satış rekordunu qıraraq 660.000 ədəd satılıb, 10 gün ərzində isə satış 1 milyonu ötüb. Bu uğur nəzərə alınaraq, Ultra modelinə gözləntilər daha da artıb. Son məlumatlara görə, cihazın “ürəyini” MediaTek Dimensity 9400+ prosessoru təşkil edəcək.

Tanınmış texnologiya sızdırıcısı Digital Chat Station-un verdiyi məlumata görə, Redmi K80 Ultra, Dimensity 9400-ün daha güclü versiyası olan Dimensity 9400+ ilə işləyəcək. Yeni çip haqqında məlumat az olsa da, onun mövcud Dimensity 9400-ün “overclock” edilmiş versiyası olduğu güman edilir. Bu inkişafla Redmi K80 Ultra, iQOO, OnePlus, Realme və Honor kimi brendlərin büdcəli flaqman modelləri ilə amansız rəqabətə qalxacaq.

Telefonun dəqiq satış tarixi hələ açıqlanmasa da, əvvəlki model K70 Ultra-nın iyul ayında satışa çıxarılması nəzərə alınaraq, K80 Ultra-nın da təxminən eyni vaxtda satışa çıxarılması gözlənilir. Redmi K70 Ultra-nın əsas xüsusiyyətləri artıq məlumdur: 6.67 düym 1.5K 8T OLED ekran, 144 Hz yeniləmə tezliyi, 20 MP ön kamera, 50 MP OIS dəstəkli Sony IMX906 əsas kamera, 8 MP ultraseh, 2 MP makro kamera, 5500 mAh batareya, 120 Vt sürətli şarj dəstəyi və MediaTek Dimensity 9300+ prosessoru.

Qısası, Redmi K80 Ultra, güclü texniki xüsusiyyətləri və əlçatan qiyməti ilə bazarda öz yerini möhkəmləndirməyə hazırlaşır.