Reutersin Şok Hesabatı: Meta Fırıldaqçı Reklamlardan Milyardlarla Dollar Qazanır

Reuters agentliyinin yayımladığı diqqətçəkən bir hesabat “Meta” şirkətinin platformalarında yayımlanan fırıldaqçı reklamlardan hər il milyardlarla dollar gəlir əldə etdiyini ortaya çıxarıb. Ən əsası isə, iddialara görə, “Meta” bu fırıldaqçılığa bilərəkdən göz yumur. Şirkət bu saxta reklamları əsas gəlir mənbəyinə çevirib. Hesabatda bildirilir ki, “Facebook”, “Instagram” və “WhatsApp”ın ana şirkəti olan “Meta” qeyri-qanuni və saxta məhsul reklamlarının yayımlanmasına məqsədli şəkildə icazə verib. Bu strategiya nəticəsində şirkət təkcə 2024-cü ildə bu cür reklamlardan 16 milyard dollar həcmində nəhəng gəlir götürüb.

Reutersin əldə etdiyi daxili sənədlər vəziyyətin nə qədər ciddi olduğunu göstərir. Sənədlərdən bəlli olur ki, “Meta” fırıldaqçı hesabları silməkdə tərəddüd edib. Şirkət istifadəçilərin təhlükəsizliyindən daha çox reklam gəlirlərini ön planda saxlayır. Bu daxili siyasət nəticəsində hər gün milyardlarla riskli reklam istifadəçilərə təqdim edilir. Faktlar göstərir ki, daxili qərarlar qazanılan pulların platformanın təhlükəsizlik standartlarından üstün tutulmasına səbəb olur.

“Meta” bu ciddi ittihamlara cavab verərkən, sözçüsü iddia edib ki, bu reklamlardan əldə edilən gəlir göstərilən məbləğdən "xeyli aşağıdır." Buna baxmayaraq, nümayəndə dəqiq rəqəmi açıqlamaqdan imtina edib. “Meta” sözçüsü deyib: "Biz platformalarımızda fırıldaqçılıq və saxtakarlıqla qətiyyətlə mübarizə aparırıq." Şirkət, həmçinin son 18 ayda saxta reklamlarla bağlı qlobal səviyyədə istifadəçi şikayətlərini 58 faiz azaltdıqlarını qeyd edib. Bundan başqa, 2025-ci ilə qədər 134 milyondan çox saxta reklam məzmununu sildiklərini də vurğulayıblar. “Meta” bu addımlarla fırıldaqla mübarizənin davamlı olduğunu bildirsə də, Reutersin təqdim etdiyi daxili sənədlər ciddi suallar doğurur.