Samsung Apple üçün qatlanan telefon ekranları istehsalına başlayır

Apple-ın qatlanan telefon bazarına girməsinə hazırlıq görüldüyü bir vaxtda, Samsung şirkətinin atdığı addım diqqət çəkib. Cənubi Koreya texnologiya nəhəngi Apple-ın ilk qatlanan iPhone'u üçün xüsusi OLED panel istehsal xətti qurur. Samsung Display-in Cənubi Çxuncxonq əyalətindəki A3 zavodunda yerləşən bu xətt yalnız Apple üçün işləyəcək.

Sənaye mənbələrinə görə, yeni istehsal xəttinin aylıq istehsal gücü 35 min ədəd qatlanan ekran, illik istehsal gücü isə təxminən 15 milyon ədəd olacaq. Bu rəqəm Apple-ın qatlanan iPhone üçün proqnozlaşdırdığı istehsal həcmindən xeyli yüksəkdir. Məlumata görə, Apple ilk qatlanan iPhone'u üçün 6-8 milyon ədəd istehsal etməyi planlaşdırır və bu telefonun 2026-cı ildə satışa çıxması gözlənilir.

Samsung-un bu qədər böyük istehsal gücü yaratması, Apple-ın hər il yeni qatlanan modellər buraxmağı planlaşdırdığını göstərir. Hazırda Apple bu modelin prototiplərini sınaqdan keçirir. Son dizayn və aparat detalları müəyyən edildikdən sonra cihaz kütləvi istehsala veriləcək. Mövcud cədvələ əsasən, Apple qatlanan iPhone'u 2026-cı ilin sentyabr ayında təqdim etməyi planlaşdırır.

Samsung-un Apple üçün ayrıca istehsal xətti qurması, bu iki rəqib şirkət arasında strateji əməkdaşlığın əhəmiyyətini nümayiş etdirir. Bu barədə fikirlərinizi bölüşmək istəyərsinizmi?