Samsung One UI 7 yenilənməsi bəzi istifadəçilərdə batareya ömrünü azaldır?

Samsung-un Galaxy S23, S24 Ultra və Z Fold 6 modelləri üçün təqdim etdiyi One UI 7 yenilənməsi bəzi istifadəçilərdə batareyanın daha tez boşalmasına səbəb olub. Gündəlik istifadədə cihazlarını bir neçə dəfə doldurmaq məcburiyyətində qaldıqlarını bildirən istifadəçilər, yeniləmədən sonra batareyanın işləmə müddətinin normaldan aşağı düşdüyünü vurğulayıblar.

Ancaq bu vəziyyət bütün istifadəçilər üçün keçərli deyil. Bəzi istifadəçilər əksinə, batareyanın işləmə müddətinin artdığını bildiriblər. Mütəxəssislərin fikrincə, bu vəziyyət sistem xətası ilə bağlı deyil. One UI 7 yenilənməsindən sonra cihazın enerji idarəetmə sistemi əvvəl toplanmış enerji istehlakı məlumatlarını sıfırlayır. Bu, cihazın istifadəçi vərdişlərini yenidən təhlil etməsi və enerji qənaət alqoritmlərini yenidən qurmağı tələb edir. Sistemin yenidən öyrənmə prosesi müvəqqəti olaraq enerji istehlakının artmasına səbəb olur.

Samsung-un açıqlamasında bunun normal olduğu bildirilib. Yeni telefon quraşdırıldıqdan sonra batareyanın istehlakında olduğu kimi, One UI 7 yenilənməsindən sonra batareya istifadəsinin artmasının bir neçə gün ərzində normal vəziyyətə qayıdacağı qeyd edilib. Həmçinin, istifadəçilərin bu prosesə heç bir müdaxilə etmələrinin lazım olmadığı vurğulanıb. Əvvəllər bəzi səhvlər səbəbindən dayandırılmış One UI 7 yenilənməsi hazırda bütün istifadəçilər üçün yenidən mövcuddur.