Samsungdan 6 illik proqram təminatı yeniləməsi

Telefon və ya planşet alarkən nəzərə alınmalı ən vacib meyarlardan biri də proqram təminatının yenilənməsidir. Bu sayədə cihazlar yeni xüsusiyyətlərlə təchiz olunmuş ən son əməliyyat sistemlərində problemsiz işləyə bilir, təhlükəsizlik yeniləmələri isə onları potensial zəifliklərdən qoruyur.

Samsung son aylarda istifadəçilərini sevindirəcək mühüm bir addım atdı. Şirkət oktyabr ayında satışa çıxardığı Galaxy A16 5G modelinə 6 il proqram təminatı dəstəyi verəcəyini elan etdi. Bu, smartfonun uzun müddət müasir qalmasını və təhlükəsizlik baxımından daha etibarlı olmasını təmin edir.

Yalnız bu model deyil, bundan sonra satışa çıxarılacaq orta seqmentli bir çox Samsung cihazının da 6 il Android və təhlükəsizlik yeniləmələri alacağı gözlənilir. Ancaq qeyd edək ki, köhnə modellər 6 illik yeniləmə dəstəyindən yararlana bilməyəcək.

6 illik yeniləmə alacaq Samsung modelləri arasında Galaxy A56 5G, Galaxy A36 5G, Galaxy A26 5G, Galaxy A16 və Galaxy M16 5G də yer alır. Samsung-un bu yeni yeniləmə siyasəti barədə fikirlərinizi bizimlə bölüşməyi unutmayın!