Seat Ibiza Tam Elektrikli Versiyaya Keçir: Tarix Və Səbəblər Açıqlandı

Volkswagen Qrupuna daxil olan İspan avtomobil istehsalçısı Seat, ən məşhur və əfsanəvi modeli olan İbizanı elektrik dövrünə hazırlayır. Elektrikli avtomobil bazarında yavaşlama müşahidə olunsa da, şirkət elektrikləşdirmə hədəflərindən dönməyəcəyini qəti şəkildə bildirib. Seat markası İbizanın gələcəkdə də ən ikonik modellərindən biri olaraq qalacağına inanır.

Seat-ın Satış və Marketinq üzrə vitse-prezidenti Sven Şuvirt qeyd edib ki, modelin populyarlığı o qədər dərindir ki, bir çox sürücü "Mən SEAT Ibiza sürürəm" əvəzinə, sadəcə "Mən Ibiza sürürəm" deyir. Bu fakt, modelin istehlakçıların şüurunda nə qədər köklü yer tutduğunu göstərir. Buna görə də, şirkət adın saxlanılması qərarını verib. Baxmayaraq ki, Volkswagen Qrupunda olan digər markaların artıq ən azı bir tam elektrikli avtomobili var, SEAT-ın məhsul çeşidində hələ tam elektrikli model yoxdur. Lakin bu vəziyyət yaxın zamanda dəyişəcək.

Şirkətin strategiyasına görə, Seat Ibiza modelinin elektrikləşdirilməsi mərhələli şəkildə həyata keçiriləcək. Modelin tam elektrikləşdirilməsinə doğru atılan ilk addım 2027-ci ildə baş tutacaq; həmin il Ibiza yumşaq hibrid mühərrik seçimi ilə satışa çıxarılacaq. Tam elektrikli İbizanın isə 2028-ci ildən sonra təqdim edilməsi planlaşdırılır. Bununla belə, SEAT rəhbərliyi, modelin kütləvi istehsalına 2029-cu ildən əvvəl başlanmayacağını açıqlayıb. Şuvirt bu gecikmənin əsas səbəbinin iqtisadi reallıqlar olduğunu vurğulayıb. Elektrikli avtomobil texnologiyaları hələ də baha başa gəlir və istehlakçılar bu seqmentdə yüksək qiymətlər ödəməyə hələ tam hazır deyillər.

Keçid dövründə Seat şirkəti hibrid texnologiyalara fokuslanır. 2027-ci ildə Ibiza ilə yanaşı, Arona modellərinin də yumşaq hibrid versiyaları buraxılacaq, tam hibrid Leon isə 2028-ci ildə onlara qoşulacaq. Tam elektrikli İbizanın Volkswagen Qrupu tərəfindən kompakt elektrik modelləri üçün hazırlanmış olan MEB Entry platformasında inşa ediləcəyi gözlənilir. Bu strategiya, brendin həm iqtisadi vəziyyəti, həm də bazarın tələbatını nəzərə alaraq elektrik mobilliyinə tədricən keçməsinə imkan verir.