TSMC 1.4 nm istehsal prosesini elan etdi!

Tayvanlı yarımkeçirici istehsalçısı TSMC növbəti nəsil 1.4 nm istehsal prosesini təqdim edib. "A14" adlandırılan bu texnologiyanın kütləvi istehsalına 2028-ci ildə başlanılması planlaşdırılır. Bu sistem eyni zamanda NanoFlex Pro adlı yeni optimallaşdırma texnologiyasını da özündə birləşdirəcək.

TSMC-nin açıqlamasına görə, A14 istehsal prosesi mövcud 2 nm texnologiyasına nisbətən əhəmiyyətli üstünlüklər təklif edir. Şirkət eyni güc və sxem mürəkkəbliyi ilə 10%-15% performans artımının əldə edildiyini bildirib. Həmçinin, A14-ün eyni tezlik və tranzistor sıxlığı ilə müqayisədə 25%-30% az enerji sərf etdiyi və 20% daha yüksək tranzistor sıxlığı təklif etdiyi elan edilib. Beləliklə, prosessorlar daha kompakt, daha effektiv və daha yüksək performanslı olacaq.

Ənənəvi ön səth güc paylama quruluşunu üstün tutan A14, xüsusilə intensiv güc kabeli tələb etməyən tətbiqlər üçün daha aşağı istehsal xərcləri təmin edir. Şirkət A14-ün ikinci nəslinə Arxa Tərəfdən Güc Verilməsi Şəbəkəsi sistemini əlavə etməyi planlaşdırır.

A14 ilə birlikdə gələn NanoFlex Pro arxitekturası çip dizaynerlərinə daha çox rahatlıq verir. Bu sistem istehsalçılara müəyyən tətbiqlər və ya iş yükü üçün tranzistor konfiqurasiyalarını incə tənzimləməyə imkan verir. Bu da hər müştərinin ehtiyaclarına uyğun xüsusi dizaynların istehsalına imkan verir.

TSMC-nin cari yol xəritəsinə görə, 2 nm texnologiyanın inkişaf etmiş versiyaları olan N2P və A16 istehsal prosesləri A14-dən əvvəl 2026-cı ilin sonlarında kütləvi istehsala başlayacaq.