11 il əvvəl yoxa çıxmış Malayziya təyyarəsinin axtarışları bərpa olunur

Malayziya hökuməti 11 il əvvəl yoxa çıxan MH370 reysi ilə bağlı yeni axtarış tədbirlərinə başlayır. Malayziya hava yollarına məxsus “Boeing 777” sərnişin təyyarəsinin axtarışları bu ay bərpa ediləcək. Bu barədə Malayziyanın Nəqliyyat Nazirliyi rəsmi bəyanat yayıb.

Kuala-Lumpurdan Pekinə uçan təyyarə 2014-cü ildə okean üzərində hərəkət edərkən müəmmalı şəkildə radarlardan itib. Təyyarənin göyərtəsində ümumilikdə 239 nəfər, yəni 227 sərnişin və 12 ekipaj üzvü var idi. Bu vaxta qədər nə təyyarədən, nə də sərnişinlərdən heç bir əhəmiyyətli iz tapılmayıb. Bu itkinlik aviasiya tarixinin ən böyük sirrlərindən biri olaraq qalır.

Yeni axtarış işləri “Ocean İnfinity” dəniz-tədqiqat şirkəti tərəfindən aparılacaq. Şirkət axtarış tədbirlərinin dəniz dibində 55 gün ərzində fasiləli şəkildə həyata keçiriləcəyini təsdiqləyib. Malayziya hökuməti və "Ocean Infinity" arasında razılaşdırılan şərtlər var. Əgər şirkət cənubi Hind okeanında 15 min kvadrat kilometr (5 790 kvadrat mil) ərazidə mühüm qalıqlar aşkar edərsə, 70 milyon dollar məbləğində böyük bir mükafat alacaq.