2025-ci ildə indiyədək beynəlxalq oyunlarda ən çox qol vuran futbolçu açıqlanıb

Beynəlxalq Futbol Tarixi və Statistikaları Federasiyası 2025-ci ilin beynəlxalq turnirlərində ən çox qol vuran futbolçuları açıqlayıb. Bu siyahı həm klub, həm də milli komanda səviyyəsində beynəlxalq arenada keçirilən matçları əhatə edir.

Siyahının birinci pilləsində Norveç millisinin və İngiltərənin "Mançester Siti" klubunun hücumçusu Erlinq Holann yer alıb. Gənc forvard cari ildə beynəlxalq matçlarda ümumilikdə 23 dəfə fərqlənməklə zirvədədir. Onun qol statistikasına baxsaq, Holann klub forması ilə 10, Norveç millisinin heyətində isə 13 dəfə adını tabloya yazdırıb. Holann beləliklə Avropanın ən məhsuldar hücumçusu olduğunu bir daha sübut edir.

İkinci sırada isə İngiltərə millisinin təcrübəli oyunçusu Harri Keyn qərarlaşıb. Keyn hazırda Almaniyanın "Bavariya" klubunda çıxış edir. Təcrübəli oyunçu bu il beynəlxalq qarşılaşmalarda 21 qolun müəllifi olub. Bu qolların 14-ü "Bavariya"nın, 7-si isə İngiltərə millisinin hesabına yazılıb. Holann və Keyn 2025-ci ilin ilk aylarında beynəlxalq səviyyədə ən yüksək fərqlənmə əmsalına malikdirlər.

Bu statistika göstərir ki, hər iki futbolçu həm klublarında, həm də yığma komandalarında öz mövqelərini qoruyublar. Onların arasında fərq hazırda cəmi iki qol təşkil edir.