ABŞ Kaliforniya sahillərində neft quyuları qazmağa başlayacaq

ABŞ hökuməti uzun fasilədən sonra Kaliforniya sahilləri yaxınlığında neft quyularının yenidən qazılmasına icazə verməyə hazırlaşır. Bu addım ölkənin enerji siyasətində ciddi dəyişikliklərin baş verdiyini göstərir. Ağ Ev tərəfindən hazırlanan beş illik plan layihəsi neft yataqlarının işlənilməsi fəaliyyətini yenidən aktivləşdirməyi hədəfləyir.

“The Washington Post” nəşri Ağ Evin neft yataqlarının işlənilməsi üzrə beş illik planının layihəsi ilə tanış olan mənbəyə istinad edərək proqramın detallarını açıqlayıb. Amerika liderinin proqramı 2027-2030-cu illər ərzində Kaliforniya sahilləri yaxınlığında qazma işləri üçün altı lisenziya ilə bağlı tenderin keçirilməsini nəzərdə tutur. Bu təklif ABŞ-ın enerji təhlükəsizliyi baxımından atdığı mühüm addımdır. Vaşinqton həmçinin, Meksika körfəzi və Alyaska ərazilərindəki yataqların işlənməsi üçün torpaq sahələrinin icarəyə verilməsini də planlaşdırır.

Sənədə əsasən, qazma işlərinin genişləndirilməsi xüsusilə Meksika körfəzinin şərq hissəsində nəzərdə tutulur. ABŞ administrasiyası həmin bölgədə 2029 və 2030-cu illərdə torpaq sahələrinin icarəyə verilməsi imkanını nəzərdən keçirir. Beləliklə, uzun müddət davam edən məhdudiyyətlərdən sonra neft hasilatı proqramı ölkənin üç əsas dəniz bölgəsini əhatə etməyə başlayacaq.