ABŞ "Tengizşevroyl" və Karaçaqanak" şirkətlərinə qarşı sanksiyaları ləğv edib

ABŞ bir sıra əsas Rusiya və Qazaxıstan enerji şirkətlərinə tətbiq etdiyi sanksiyaları ləğv etmək qərarına gəlib. Bu addım ABŞ Maliyyə Nazirliyinin açıqladığı 124B nömrəli ümumi lisenziya ilə təsdiqlənir. Sanksiyalar Rusiyanın "Rosneft" və "Lukoyl" şirkətləri ilə yanaşı, Qazaxıstanda fəaliyyət göstərən mühüm layihələrdən, o cümlədən Xəzər Boru Kəməri Konsorsiumu (XBKK), "Tengizşevroyl"a və Qaraçaqanak yatağının işlənməsi layihəsinə qarşı qaldırılıb. Bu qərar adı çəkilən müəssisələrin əməliyyat fəaliyyətlərinin davam etdirilməsi üçün imkan yaradır.

Lisenziyada bildirilir ki, XBKK, "Tengizşevroyl" və Karaçaqanak layihəsi ilə bağlı bütün əməliyyatlara icazə verilir. Bu, neft və qaz çıxarılması ilə bağlı gündəlik işlərin maneəsiz aparılması deməkdir. Ancaq sanksiyaların tamamilə aradan qaldırılmadığını göstərən bəzi məhdudiyyətlər hələ də qüvvədədir. Belə ki, siyahıda adı sadalanan şirkətlərə payların satışı və ya ötürülməsi ilə əlaqəli hər hansı maliyyə əməliyyatları qadağan olunur. XBKK əsasən Qərbi Qazaxıstandakı yataqlardan neft nəql edən Xəzər Magistral Neft Kəmərini idarə edən mühüm beynəlxalq şirkətdir.

Bu sanksiyaların ləğvi Qazaxıstan hökumətinin uzun müddət davam edən səylərinin nəticəsidir. Qazaxıstanın energetika naziri Yerlan Akkenjenov daha əvvəl jurnalistlərə ölkənin ABŞ tərəfindən Qaraçaqanak neft yatağına tətbiq edilən sanksiyaların aradan qaldırılması istiqamətində çalışdığını bildirmişdi. ABŞ Maliyyə Nazirliyinin ümumi lisenziyanı açıqlaması ilə bu iqtisadi cəhətdən vacib layihənin fəaliyyətinin dayandırılması riski azalıb və neft-qaz sektorunda sabitlik üçün şərait yaranıb.