ADB Biləcəri-Yalama dəmir yolunun inkişafı üçün kredit ayırmağı planlaşdırır

Asiya İnkişaf Bankı (ADB) Biləcəri-Yalama dəmir yolu xəttinin modernləşdirilməsinə, xüsusilə elektrikləşdirmə, siqnalizasiya və telekommunikasiya işlərinə 325 milyon ABŞ dolları ayırmağı nəzərdən keçirir. Bu marşrut Şimal-Cənub dəmir yolu dəhlizinin vacib bir hissəsidir. O, "Azərbaycan Dəmir Yolları" QSC-nin beynəlxalq yük daşımalarına xidmət göstərir.

Azərbaycanın ixrac daşımalarının əksəriyyəti ya Bakı-Böyük Kəsik, ya da məhz Biləcəri-Yalama marşrutu vasitəsilə həyata keçirilir. ADB bu kreditin təsdiqi üçün dəqiq təqvimlər müəyyən edib. Layihə detallarının öyrənilməsi 2026-cı il yanvarın 26-30-na, kreditin ADB-nin Direktorlar Şurasında təsdiqi isə 2027-ci il iyunun 17-nə planlaşdırılıb. Bu layihə Azərbaycanın iqtisadi cəhətdən davamlı dəmir yolu nəqliyyatını inkişaf etdirəcək. Maliyyələşdirmə prosesi ADB, Asiya İnfrastruktur İnvestisiya Bankı (AIIB) və Azərbaycan hökuməti tərəfindən birgə aparılacaq.

Təklif edilən layihə xəttin müasir infrastrukturlarla tam təchiz edilməsini hədəfləyir. Bu, müasir elektrikləşdirmə infrastrukturu - dirəklər, kontakt şəbəkəsi, yarımstansiyalar və kabelləri əhatə edir. Həmçinin siqnalizasiya sistemləri, yol boyu siqnallar, stansiyalardakı avadanlıqlar, kabellər yenilənəcək. Telekommunikasiya sistemləri (dəmir yolu şəbəkə rabitə sistemləri, bortdakı elektron cihazlar, fiber-optik və simsiz rabitə sistemləri) də tamamilə dəyişdiriləcək. Bu tədbirlər iki dəmir yolu dəhlizi boyunca dəyişən cərəyan enerji təchizatı və siqnalizasiya işlərinin tamamlanmasına şərait yaradacaq. Bu yenilənmə Şimal-Cənub dəmir yolu dəhlizi boyunca enerji səmərəliliyi yaradacaq və təhlükəsiz dəmir yolu əməliyyatlarını təmin edəcək.

Azərbaycan 1999-cu ildən ADB-nin üzvüdür. Bank bu illər ərzində ölkəyə təxminən 5,6 milyard ABŞ dolları kredit ayırıb. Bu vəsaitin 4,4 milyard dolları dövlət sektoruna, 1,2 milyard dolları isə özəl sektorlara yönəldilmişdi. ADB xüsusən Azərbaycanın nəqliyyat sektorunda həyata keçirilən layihələrə 1,5 milyard ABŞ dolları, enerji layihələrinə isə 1,7 milyard ABŞ dolları ayırıb. Bank yeni tərəfdaşlıq strategiyası çərçivəsində gələcəkdə Azərbaycana 2,5 milyard ABŞ dollarına qədər investisiya qoymağa hazır olduğunu bildirir. ADB-nin baş qərargahı Manilada yerləşir; 1966-cı ildə təsis edilmiş bu maliyyə qurumunda 69 səhmdar ölkə, o cümlədən Asiya-Sakit okean regionundan olan 50 ölkə təmsil olunur.