"Airbus A320" təyyarələrində radiasiya problemi aradan qaldırılıb

Dünyanın müxtəlif hava yolları şirkətləri “Airbus A320” təyyarələrində Günəş radiasiyasına bağlı yaranan zəifliyi qısa müddətdə aradan qaldırmağın üsulunu tapıblar. “Bloomberg” agentliyinin yaydığı məlumata görə, bu nasazlıq təxminən 6000 A320 ailə təyyarəsinə təsir edib. Şirkətin açıqlamasına görə, problem hündürlüyün hesablanmasına cavabdeh olan proqram təminatının bir hissəsinə təsir edirdi. Yüksək hündürlüklərdə intensiv Günəş radiasiyası məlumatları təhrif edə bilirdi, bu da kütləvi uçuş gecikmələri və ləğvlərə səbəb olurdu.

“Airbus” təyyarələrinin elektron idarəetmə sistemi idarəetmə və uçuşa nəzarət komponentləri arasında birbaşa mexaniki əlaqə olmadan işləyir. Bütün pilot əmrləri kompüter vasitəsilə həyata keçirilir. Məhz bu sistemin proqram təminatındakı səhv radiasiyadan təsirlənərək yanlış məlumatlar ötürürdü. Problemin kəskinliyinə baxmayaraq, əsas operatorlar və tənzimləyici orqanlar vəziyyətə tez reaksiya verdilər.

“Airbus” və Avropa Aviasiya Təhlükəsizliyi Agentliyinin fövqəladə göstərişindən cəmi 24 saat keçmiş, “A320” təyyarələrinin ən böyük operatorları – American Airlines, “IndiGo” və “easyJet” – öz donanmalarını dərhal əvvəlki proqram təminatı versiyasına geri qaytardılar. American Airlines bildirdi ki, texniki heyət bir gecədə işləyərək 209 təyyarədən yalnız dördündə texniki xidmət tələb olunacağını müəyyənləşdirdi. Proqram təminatının əvvəlki versiyasına qayıtmaq təxminən 2-3 saat çəkir. Bununla belə, minə qədər köhnə təyyarənin tam avadanlıq təkmilləşdirilməsi tələb oluna bilər. Bu vəziyyətdə, həmin təyyarələr müvəqqəti olaraq istismardan çıxarılacaq.