AMB: Xarici valyuta bazarında təklif tələbi üstələyir - YENİLƏNİB

Azərbaycanın xarici valyuta bazarında təklifin tələbi üstələməsi səbəbindən ümumi vəziyyət sabit qalır. Azərbaycan Mərkəzi Bankının (AMB) sədri Taleh Kazımov AMB-nin faiz dəhlizinin parametrləri ilə bağlı keçirdiyi mətbuat konfransında bu mövzudan danışıb. Kazımovun sözlərinə görə, həm AMB-nin, həm də Dövlət Neft Fondunun valyuta ehtiyatları artmaqda davam edir. Bu artım bazarda təklifin tələbdən çox olduğunu göstərir. Bu il AMB-nin keçirdiyi valyuta hərraclarında orta satış 45 milyon ABŞ dolları təşkil edib. Doqquz ay ərzində müsbət saldo 230 milyon manat ABŞ dolları olub. Bu fakt onu göstərir ki, əhali valyutanı daha çox satır, nəinki alır.

Ölkənin xarici valyuta bazarında stabillik davam edir. Əhalinin məzənnə ilə bağlı gözləntilərinin müsbət olması müşahidə olunur. Son yeddi ayın məlumatlarına görə, mübadilə şöbələri tərəfindən nağd xarici valyutanın alışı onun satış göstəricisini üstələyib. Rezident fiziki şəxslərin əmanətlərinin dollarlaşma səviyyəsi də azalıb. Bu göstərici son bir ildə 1,8 faiz bəndi azalaraq sentyabrda 29%-ə düşüb. Valyuta bazarında tarazlığın qorunmasının əsas amili xarici sektor göstəricilərinin əlverişli olaraq qalmasıdır.

Xarici ticarət balansındakı müsbət göstəricilər də bazarı dəstəkləyir. Dövlət Gömrük Komitəsinin məlumatına görə, 2025-ci ilin doqquz ayında xarici ticarət balansının müsbət saldosu 1,8 milyard ABŞ dolları təşkil edib. Həmçinin, pul baratları üzrə xalis daxilolmalar ötən illə müqayisədə müsbət dinamika nümayiş etdirir. Bütün bunlar tədiyə balansının cari hesabının profisitli olmasını dəstəkləyir. Bu vəziyyət fonunda, AMB 2025-ci ilin sonu üçün cari hesabın profisiti üzrə proqnozunu cüzi artırıb. 2026-cı ilə aid cari hesabın profisit proqnozu isə dəyişməz saxlanılıb.