Azərbaycan millisi dünya çempionatında 11 boksçu ilə iştirak edəcək

Boks üzrə Dünya Çempionatı dekabrın 3-dən 13-dək Birləşmiş Ərəb Əmirliklərinin Dubay şəhərində keçiriləcək. Dünya miqyaslı bu yarışa 120-dən çox ölkə qatılacaq. Bu böyük mundialda Azərbaycan millisi də mübarizə aparan komandalardan biri olacaq.

Komandanın baş məşqçisi Ravşan Xocayev çempionatda 11 idmançıya şans verəcək. Təmsilçilərimiz müxtəlif çəki dərəcələrində rinqə çıxacaqlar. Heyətdə Sübhan Mamedov (48 kq), Nicat Hüseynov (51 kq), Zəlimxan Süleymanov (54 kq), Ümid Rüstəmov (57 kq), Məhəmmədəli Aşurəliyev (60 kq) və Maqsud Xasmetov (63,5 kq) yer alıb.

Həmçinin, yarışda Zaur Qəhrəmanov (67 kq), Sərxan Əliyev (70 kq), Səidcəmşid Səfərov (80 kq), Alfonso Dominqes (86 kq) və ağır çəki dərəcəsində Məhəmməd Abdullayev (+92 kq) mübarizə aparacaq. Milli komandanın rəhbərliyini Azərbaycan Boks Federasiyası İdarə Heyətinin üzvü Rövşən Hüseynov həyata keçirəcək. Mundialda Fuad Aslanov və Rövşən Qədirov isə hakimlər arasında Azərbaycanı təmsil edəcəklər.