Azərbaycan sülhün reallaşmasına əlverişli şərait yaradıb - Kamaləddin Qafarov

Milli Məclisin deputatı Kamaləddin Qafarov bildirib ki, Prezident İlham Əliyevin Astanada səsləndirdiyi bəyanat Azərbaycan və Qazaxıstan arasında münasibətlərin sarsılmaz əsaslara söykəndiyini bir daha göstərdi. Deputatın sözlərinə görə, dövlət başçısının çıxışında həm siyasi uzaqgörənlik, həm də regional əməkdaşlığa verilən yüksək dəyər aydın hiss olunur. Prezident Əliyev Qazaxıstanın inkişafını və Prezident Kasım-Jomart Tokayevin modernləşmə siyasətini yüksək qiymətləndirib. O, Qazaxıstanın regionda etibarlı tərəfdaş, müstəqil siyasət yürüdən güclü dövlət kimi möhkəmləndiyini vurğulayıb. Əliyevin bu mövqeyi Türk dünyasında qarşılıqlı hörmət və bərabərhüquqlu əməkdaşlıq modelinin möhkəmlənməsinə mühüm töhfədir.

Qafarov əlavə edib ki, Azərbaycan-Qazaxıstan münasibətləri sadəcə siyasi yaxınlıq deyil, bu proses dərin mənəvi bağlara əsaslanır. Prezident Əliyev öz çıxışında qeyd edib ki, ən çətin dövrlərdə belə Azərbaycan həmişə Qazaxıstanın dəstəyini hiss edib. Bu fakt xalqlarımızın dostluğunun sözdə deyil, məhz əməldə qurulduğunu göstərir. Dövlət başçısının çıxışında sülh mövzusu da xüsusi yer tutur. Prezident Əliyev Ermənistanla münasibətlərin normallaşması istiqamətində atılan addımların nə qədər səmimi və praktiki nəticəli olduğunu diqqətə çatdırıb.

Qazaxıstanın Ermənistana taxıl tranziti buna ən real nümunədir. Azərbaycan bu tranzitin həyata keçirilməsinə şərait yaratmaqla, sülhün sadəcə kağız üzərində qalmaması, əksinə, real həyatda təcəssüm tapması üçün zəmin hazırlayıb. Prezident Əliyevin qeyd etdiyi kimi, iki ölkə arasındakı əməkdaşlıq artıq regional səviyyəni aşaraq qlobal əhəmiyyət kəsb edir. Orta Dəhliz və Zəngəzur dəhlizi kimi böyük layihələr həm iqtisadi inteqrasiyanı dərinləşdirəcək, həm də siyasi sabitliyi gücləndirəcək. Beləliklə, Prezident İlham Əliyevin bəyanatı qardaşlıq, əməkdaşlıq və sülh fəlsəfəsini özündə birləşdirən vacib bir siyasi sənəddir. Bu çıxış Azərbaycanın regionda inkişaf və tərəfdaşlıq xəttinə sadiq qaldığının ən bariz göstəricisidir.