Bakı və Sumqayıt arasında yeni marşrut xətti istifadəyə verilir

Bakı və Sumqayıt şəhərləri arasında 500 nömrəli müntəzəm avtobus marşrutu istifadəyə verilir. Azərbaycan Yerüstü Nəqliyyat Agentliyi (AYNA) bu qərarı Sumqayıt şəhərindən paytaxta olan böyük sərnişin axınını nəzərə alaraq verib. Yeni marşrut xəttinin təşkili vətəndaşların metronun "20 Yanvar" stansiyası istiqamətində sürətli, eyni zamanda rahat gedişlərini təmin etmək məqsədi daşıyır.

Yeni marşrut 12 noyabr tarixindən etibarən fəaliyyətə başlayacaq. Avtobuslar Sumqayıt şəhərinin Zülfü Hacıyev küçəsindən (Heydər Əliyev parkı) hərəkətə başlayacaq. Onlar Nəriman Nərimanov küçəsi, Sülh prospekti və Ceyranbatan qəsəbəsindən keçməklə hərəkət edəcək. Marşrutun son dayanacaq məntəqəsi Bakı şəhərinin Seyid Cəfər Pişəvari küçəsi kimi müəyyən edilib.

Xətt üzrə sərnişinlərə xidmət göstərəcək nəqliyyat vasitələrinin sayı 20 ədəd olacaq. Bunlar ekoloji cəhətdən təmiz olan, CNG texnologiyası ilə təchiz edilən böyüktutumlu avtobuslardır. Avtobuslar bu istiqamətdə səhər saat 05:45-dən gecə 23:00-dək işləyəcək. 500 nömrəli marşrut xətti üzrə avtobusların hərəkət intervalı 7-8 dəqiqə təşkil edəcək. Avtobuslarda ödənişlər yalnız nağdsız qaydada qəbul edilir, gedişhaqqı 0,80 manat müəyyən edilib.