Böyük Britaniyanın keçmiş Baş naziri xərçəngdən sağaldığını açıqladı

Böyük Britaniyanın sabiq Baş naziri Devid Kameron prostat xərçəngi ilə müalicə aldığını açıqlayıb. O, 2010-cu ildən 2016-cı ilə qədər ölkə hökumətinə rəhbərlik edən siyasətçidir. Kameron müalicənin uğurlu olduğunu və sağaldığını “The Times” qəzetinə verdiyi müsahibədə bildirib.

D. Kameron 2024-cü ildə prostat xəstəliyinin erkən aşkarlanması üçün skrininq testindən keçmək qərarına gəlib. O, radioda problemin erkən tapılmasının müalicə şansını necə artırdığı barədə bir xəbər eşitmişdi. Mühafizəkarlar Partiyasının keçmiş lideri dərhal lazımi təhlilləri etdirdi. Aparılan analizlər və əlavə testlər bu vəziyyətin prostat xərçəngi olduğunu təsdiqlədi.

Diaqnoz qoyulduqdan sonra siyasətçi 2025-ci ilin iyun ayında xüsusi bir müalicəyə başladı. Bu müalicə "fokus" terapiyası adlanır. Bu üsul xərçəng hüceyrələrini məhv etmək üçün iynələr vasitəsiylə elektrik impulslarının ötürülməsini əhatə edir. Aparılan müalicə uğurlu oldu. Kameronun sağlamlığı ilə bağlı bu açıqlaması, erkən skrininqin əhəmiyyətini bir daha önə çıxarır və insanları testdən keçməyə həvəsləndirir.