Cəlil Məmmədquluzadənin Tbilisidəki barelyefində “Azərbaycan” sözü bərpa olunub

Tbilisidə yerləşən Cəlil Məmmədquluzadənin barelyefinə vandal müdaxiləsi aradan qaldırılıb. Xatirə lövhəsi üzərində əvvəllər pozulmuş "Azərbaycanın" yazısı bərpa edilib. Bu zədələnmiş yazı üzərindəki ağ cızıqlar xüsusi məhlulla silinib, nəticədə bərpa işləri başa çatdırılıb.

Bu bərpa işlərini Azərbaycanın Gürcüstandakı səfirliyi və Cəlil Məmmədquluzadənin ev-muzeyinə ictimai nəzarət edən Gürcüstanın Azərbaycanlı Ağsaqqallar Şurası birgə həyata keçirib. Ərazidə təhlükəsizlik kameraları olmadığı üçün yazını kimin pozduğunu müəyyənləşdirmək mümkün olmayıb.

Qeyd edək ki, ev-muzeyinin yerləşdiyi bina 2007-ci ildən etibarən mədəni irs abidəsi statusu daşıyır. Gürcüstan qanunvericiliyinə görə, bu cür tikililərin fasadlarına icazəsiz yazılar yazılması və ya "qrafiti" çəkilməsi ciddi qanun pozuntusudur. Bu əməllərə görə 2 min lari (təxminən 1 250 AZN) məbləğində cərimə tətbiq olunur.