Çin, Mərkəzi Asiya ölkələri və Azərbaycan yeni multimodal marşrut açıb

Oktyabrın 15-də Çinin Kaşqar şəhərindən Çin-Qırğızıstan-Özbəkistan-Türkmənistan-Azərbaycan marşrutu üzrə ilk beynəlxalq multimodal konteyner qatarı yola salınıb.

"Uztemiryulkonteyner" şirkətinə görə, Siandan və Çendudan göndərilən yüklər əvvəlcə dəmir yolu ilə Kaşqara çatdırılır.

Daha sonra bu yüklər avtomobil nəqliyyatı ilə Oşa, oradan isə yenə dəmir yolu ilə Türkmənistan limanına daşınır. Sonda isə dəniz yolu ilə Bakıya gətirilir.

Bu marşrut Transxəzər Beynəlxalq Nəqliyyat Marşrutunun (TBNM) cənub qolu hesab olunur. Bu xətt həmçinin Orta Dəhliz kimi tanınır.

Planlaşdırılır ki, yüklər oktyabrın 21-də Özbəkistana, 24-də isə Türkmənistana çatsın.

Yeni marşrutun işə salınması logistikanın səmərəliliyini artırmağa yönəlib. Bu, regionlararası əməkdaşlığı möhkəmləndirməyə kömək edir.

O, "Bir kəmər, bir yol" təşəbbüsü çərçivəsində Asiya ilə Avropa arasında müasir nəqliyyat dəhlizi yaratmaq məqsədi daşıyır.