Əfqanıstan və Pakistan arasındakı İstanbul danışıqları iflasa uğradı

Əfqanıstan və Pakistan nümayəndələrinin İstanbulda apardığı danışıqlar uğursuzluqla bitib. Bu görüşlərdən heç bir nəticə çıxmayıb. Məlumatı Əfqanıstanın Xarici İşlər nazirinin müavini Məhəmməd Naim təsdiqlədi.

Naimin sözlərinə görə, danışıqlar nəticəsiz qalsa da, Kabul hökuməti məntiq çərçivəsində olan hər hansı bir razılaşmaya açıqdır və buna hazırdır. Görünür, iki ölkə arasındakı gərginliyi azaltmaq səyləri hələlik istənilən effekti verməyib.

Qeyd edək ki, bu uğursuzluqdan əvvəl, Türkiyə Prezidenti Rəcəb Tayyib Ərdoğan tərəflər arasındakı münaqişəni həll etmək üçün 10 noyabr tarixində türk sülh təşəbbüsü planını açıqlamışdı. Türkiyə lideri problemin həlli yollarını tapmaq üçün səylərini davam etdirir. O, yaxın zamanda İslamabada Xarici İşlər Nazirliyi (XİN), Müdafiə Nazirliyi (MN) və xüsusi xidmət orqanlarının rəhbərlərini göndərməyi planlaşdırır. Məqsəd iki ölkə arasında münasibətlərin nizamlanması yollarını müzakirə etməkdir. Türkiyə sülh təşəbbüsü regionda sabitliyin təmin edilməsinə yönəlib.