Ermənistan məhkəməsi Karapetyanın həbs müddətinin uzadılması məsələsinə baxacaq

Ermənistanın Antikorrupsiya Məhkəməsi rusiyalı iş adamı Samvel Karapetyan haqqında tətbiq edilən həbs qətimkan tədbirinin müddətinin uzadılması ilə bağlı məsələni nəzərdən keçirəcək. Bu məhkəmə prosesi 17 noyabr tarixində baş tutacaq. Bu barədə rusiyalı iş adamı Samvel Karapetyanın vəkillərindən biri, Aram Vardevanyan məlumat yayıb.

Vardevanyan öz Facebook səhifəsində canlı yayım zamanı məhkəmə prosesinin dəqiq vaxtını açıqlayıb. O bildirib ki, Antikorrupsiya Məhkəməsi hakim Dadoyanın sədrliyi altında bu vəsatəti 17 noyabr saat 10:00-da nəzərdən keçirəcək. Karapetyan bu il iyunun 18-də Ermənistan DİN-in Baş Mütəşəkkil Cinayətkarlıqla Mübarizə İdarəsinin əməkdaşları tərəfindən saxlanılıb.

İş adamı hakimiyyəti ələ keçirməyə yönəlmiş ictimai çağırışlar etməkdə təqsirləndirilir. Hadisədən sonra İrəvan məhkəməsi əvvəlcə onun barəsində iki aylıq həbs qətimkan tədbiri seçmişdi. Lakin sonradan məhkəmə onun həbs müddətini uzatmağa qərar vermişdi. Karapetyan haqqında həbsin davam edib etməyəcəyinə dair növbəti qərar 17 noyabrda veriləcək.