Estoniya XİN başçısı Azərbaycan-Ermənistan münasibətlərinin normallaşmasında Türkiyənin rolundan danışıb

Estoniya Respublikasının xarici işlər naziri Margus Tsahkna Azərbaycan və Ermənistan arasındakı münasibətlərin normallaşması prosesində Türkiyənin oynadığı rolu yüksək qiymətləndirib. Nazir bu barədə "Anadolu" xəbər agentliyinə verdiyi müsahibəsində danışıb.

Tsahkna qeyd edib ki, Türkiyə regionda sabitliyin yaranması işində çox əhəmiyyətli rol oynayır. O, keçən həftə Azərbaycana səfər etdiyini xatırladıb. Onun sözlərinə görə, Türkiyə Azərbaycanla Ermənistan arasında sülhün və stabilliyin təmin olunması, həmçinin strateji ticarət dəhlizlərinə sərmayə qoyulması prosesini ciddi şəkildə dəstəkləyir.

Bundan əlavə, Estoniya xarici işlər naziri Türkiyə ilə münasibətlərin ümumi vəziyyətini açıqlayıb. O bildirib ki, Estoniya Türkiyə ilə həm ikitərəfli formatda, həm də bəzi digər regionlarda demək olar ki, hər sahədə əməkdaşlıq edir. Bu əməkdaşlıq ölkələr arasında davamlı əlaqələr olduğunu göstərir.