"Fly to Baku. Art Weekend. Sense the Future NOW"un xarici qonaqları layihənin miqyasından heyrətləniblər (FOTO)

Heydər Əliyev Fondu və IDEA İctimai Birliyinin təşkil etdiyi, Azərbaycan Mədəniyyət Nazirliyinin tərəfdaşlığı ilə keçirilən “Bakıya uçuş. İncəsənət həftəsonu: Gələcəyi İNDİ duy” (“Fly to Baku. Art Weekend. Sense the Future NOW”) İncəsənət Festivalının tanınmış qonaqları tədbirin təşkilindən və təqdim olunan proqramlardan böyük heyranlıq duyduqlarını bildiriblər. Bu genişmiqyaslı layihə 31 oktyabr - 2 noyabr tarixlərində Bakıda incəsənət, mədəniyyət və ekologiyanı bir araya gətirdi. Məşhur sənətkarlar və ekspertlər festivalın zəngin məzmununu və yüksək səviyyəli təqdimatını xüsusi qeyd etdilər.

Dünyaca məşhur italyan rəssam və heykəltəraş Cüzeppe Karta qeyd edib ki, festivalın zəngin proqramı müasir insan üçün həm çox maarifləndirici, həm də aktualdır. O, tamaşaçıların kolumbiyalı məşhur rəssam və heykəltəraş Fernando Boteronun əsərləri ilə tanış olmasını vacib məqam saydı – burada 100-dən çox unikal incəsənət nümunəsi nümayiş olunur. Rəssam vurğulayıb ki, festival ən yüksək səviyyədə təşkil edilib. Festival çərçivəsində, iki gün ərzində, Azərbaycan Dövlət Rəssamlıq Akademiyasında onun ustad dərsləri keçirilir. Hazırda Heydər Əliyev Mərkəzində Cüzeppe Kartanın “Təbiətin hədiyyələri” adlı fərdi sərgisi də davam edir. Bu sərgidə meyvə və tərəvəzlərin iri heykəlləri göstərilir, bəzi əsərlər isə məhz bu sərgi üçün xüsusi hazırlanıb və Bakı ictimaiyyətinə ilk dəfə təqdim edilir.

Almaniyanın Volfsburq İncəsənət Muzeyinin icraçı direktoru Otmar Böhmer tədbir çərçivəsində müxtəlif ölkələrdən, o cümlədən Azərbaycandan olan rəssamların çoxsaylı maraqlı və orijinal əsərlərini gördüyünü söylədi. O, hər bir əsərin milli ənənələri, müəllifin daxili dünyasını və müasir incəsənət baxışını özünəməxsus şəkildə əks etdirdiyini bildirib. Böhmer azərbaycanlı sənətkarlarla tanış olmaqdan xüsusilə məmnun qaldı. Onun sözlərinə görə, onların əsərləri dərinlik, forma və rəng duyumu, eləcə də fəlsəfi baxışla zəngindir. Direktor həmkarları ilə birlikdə Bakı və Azərbaycan incəsənətinə, mədəniyyətlərarası dialoqa və yeni bədii axınlara böyük maraq göstərdiklərini qeyd etdi. O, ilk səfərinin çox isti təəssüratlar yaratdığını və bu canlı incəsənət dünyasına yenidən qayıtmaq arzusunda olduğunu söyləyib.

ABŞ-dən gələn yazıçı Manuel Xesus de Atoça İris Errera da Bakıya ilk səfəri haqqında dərin təəssüratlarını bölüşdü. İngilis və ispan dillərində yazan yazıçı artıq burada çoxlu gözəllik, mədəniyyət və ilham gördüyünü bildirib. O, şəhərin necə canlı olduğunu və ölkənin incəsənətlə nəfəs aldığını hiss etməyin mümkün olduğunu vurğuladı. Yazıçı festivalın həm möhtəşəm, həm də genişmiqyaslı olduğunu deyib. O, buradakı yaradıcı atmosferin heyranedici olduğunu söylədi və bu hadisənin bir hissəsi olmaq fürsətinə görə minnətdarlığını ifadə etdi. Layihə Heydər Əliyev Fondunun vitse-prezidenti və IDEA İctimai Birliyinin təsisçisi Leyla Əliyevanın təşəbbüsü ilə həyata keçirilir.