Goranboyda yaşayış binasında uçqun baş verib, xəsarət alanlar var (FOTO/VİDEO)

Goranboy şəhəri, Cəfər Cabbarlı küçəsində yerləşən beşmərtəbəli yaşayış binasında uçqun baş verib. Bu barədə məlumat Fövqəladə Hallar Nazirliyinin (FHN) “112” qaynar telefon xəttinə daxil olub. Hadisə ilə əlaqədar dərhal FHN-in Dövlət Yanğından Mühafizə Xidməti və Aran Regional Mərkəzinin qüvvələri hadisə yerinə cəlb edilib. Qurumun qüvvələri tez bir zamanda əraziyə çatdı.

Əməliyyat şəraiti qiymətləndiriləndən sonra zərərin miqyası müəyyən edilib. Beşmərtəbəli bina ümumilikdə 60 mənzildən və altı girişdən ibarətdir. Uçqun binanın ikinci girişinin birinci mərtəbəsində qeydə alınıb. Məlumata görə, həmin mərtəbədə yerləşən iki mənzilin döşəməsi və arakəsmə divarları çöküb. Fövqəladə Hallar Nazirliyinin qüvvələri ilk olaraq binadakı sakinlərin təhlükəsizliyini təmin etdilər. Bütün bina sakinləri təxliyə olundu, ərazidə lazımi təhlükəsizlik tədbirləri görüldü.

FHN bildirir ki, bu hadisə nəticəsində dörd nəfər yüngül xəsarət alıb. Onların vəziyyəti ilə bağlı ətraflı məlumat verilməsə də, xəsarətlərinin ciddi olmadığı vurğulanır. Hazırda uçqun hadisəsi ilə əlaqədar aidiyyəti qurumlar tərəfindən geniş araşdırma aparılır. Araşdırma hadisənin səbəblərini müəyyən etməyə xidmət edir.