HƏMAS daha bir girovun meyitini İsrailə təhvil verib

Fələstinin HƏMAS təşkilatı Qəzza zolağında Beynəlxalq Qırmızı Xaç Komitəsinin nümayəndələrinə daha bir israilli girovun meyitini təhvil verib. İsrail Müdafiə Ordusunun mətbuat xidməti bu barədə məlumat yayıb.

Bu, oktyabrın 10-da atəşkəsin qüvvəyə minməsindən bəri qruplaşmanın qaytardığı 13-cü meyitdir. Girovun şəxsiyyəti müəyyən edilməsi prosedurundan sonra məlum olacaq. Bu hadisə İsrail və HƏMAS arasında atəşkəsin pozulması ilə bağlı qarşılıqlı ittihamlar fonunda baş verir.

İsrail Ordusunun verdiyi məlumata görə, qarşı tərəfin hücumu nəticəsində iki hərbçi öldürüldükdən sonra ölkənin hərbi qüvvələri Qəzza zolağına bir sıra hava zərbələri endirib. HƏMAS həmin hücumda iştirak etməsi iddialarını təkzib edib. Bölgədəki vəziyyət hələ də gərgin olaraq qalır.