İqtisadiyyat naziri energetika, nəqliyyat, turizm üzrə görülən işlərdən danışıb

İqtisadiyyat naziri Mikayıl Cabbarov Milli Məclisdə 2026-cı il dövlət büdcəsi layihəsinin müzakirəsi zamanı ölkə iqtisadiyyatının müxtəlif sahələrindəki nailiyyətlər barədə məlumat verib. O, enerji sektorunda böyük irəliləyişlər olduğunu qeyd edib. 2027-ci ilədək icrası nəzərdə tutulan 2 QVt gücündə 8 sənaye miqyaslı günəş və külək elektrik stansiyası layihəsi üzrə təxminən 2,8 milyard ABŞ dolları həcmində xarici və yerli investisiya cəlb edilib. Bu sərmayə ölkədə iqtisadi artıma ciddi töhfə verir, eyni zamanda yaşıl iqtisadiyyatın inkişafı üçün yeni imkanlar yaradır.

Nazir, həmçinin, Azərbaycanın regionda strateji rolunu gücləndirən addımlardan danışıb. “Xəzər - Qara dəniz - Avropa” və “Mərkəzi Asiya - Azərbaycan” yaşıl enerji dəhlizlərinin yaradılması haqqında sazişlərin imzalanması bu istiqamətdə atılan ən vacib addımlardır. Bu işlərin başlanması Azərbaycanın etibarlı enerji ixracatçısı və yaşıl investisiyalar məkanı kimi mövqeyini daha da möhkəmləndirəcək.

M. Cabbarov nəqliyyat və su təhlükəsizliyi sahəsindəki inkişaflara da diqqət yetirib. Son illərdə ölkənin nəqliyyat dəhlizləri üzrə mövcud infrastruktur yaxşılaşdırılıb, Ələt Dəniz Ticarət Limanının yükaşırma potensialı artırılıb. Bu islahatlar sayəsində tranzit yükdaşımalarının həcmi (boru kəməri ilə daşımalar istisna olmaqla) 2019-cu illə müqayisədə 2024-cü ildə 2.5 dəfə artaraq 14.5 milyon tona çatıb. İqtisadiyyat naziri, həmçinin, dövlət-özəl tərəfdaşlığı (DÖT) çərçivəsində icrasına başlanılmış böyük layihələrdən bəhs edib. Xəzər dənizinin suyunun duzsuzlaşdırılması ilə bağlı 407 milyon ABŞ dolları dəyərində DÖT layihəsi ölkənin su təhlükəsizliyi üçün böyük addımdır. Bu layihə texnologiya transferi və xarici investisiyaların cəlb edilməsi baxımından da əhəmiyyət daşıyır.

Tikinti sektorunun canlandırılması və turizmin inkişafı da nazirin çıxışının əsas mövzularından biri olub. Ötən illər ərzində ÜDM-in formalaşmasında böyük rolu olan tikinti sektorunda aktivliyi artırmaq üçün müəyyən işlər görülür. Xüsusilə turizm zonalarının yaradılmasına böyük önəm verilir. "Sea Breeze” turizm zonasının qurulması və Birləşmiş Ərəb Əmirliklərinin “Modon Holding”i ilə imzalanmış layihə bu işlərə misaldır. Bu müasir şəhərsalma layihəsi sağlamlıq, ticarət, təhsil və mehmanxana obyektlərini əhatə edir. Bu cür layihələr təkcə tikinti sektorunun böyüməsinə xidmət etmir, həm də turizm və xidmətlər sahəsinin inkişafına təkan verir.