İraqın Baş naziri xarici qoşunların gələn il ölkədən çıxarılmasını gözləyir

İraq 2026-cı ilin sentyabr ayına qədər bütün xarici qoşunların ölkədən tamamilə çıxarılmasını planlayır. Bu barədə İraqın Baş naziri Məhəmməd Şia əs-Sudani açıqlama verib. Baş nazir bildirib ki, bu addım İŞİD terror qruplaşması artıq ölkə üçün ciddi təhlükə yaratmadığına görə atılır.

Əs-Sudani ölkədəki mövcud vəziyyəti dəyərləndirərək, "İŞİD artıq təhlükə yaratmır. Tanrıya şükürlər olsun ki, ölkədə sabitlik, təhlükəsizlik var," deyib. O, 86 ölkənin iştirak etdiyi koalisiyanın ölkədə qalmasını necə əsaslandırmağın çətin olduğunu vurğulayıb. Baş nazirin sözlərinə görə, Bağdad ölkədəki bütün silahlı birləşmələr üzərində tam dövlət nəzarəti qurmağı hədəfləyir.

Lakin o qeyd edib ki, xarici qoşunlar, xüsusən də ABŞ qoşunları ölkədən çıxmadan bu məqsədə çatmaq mümkün deyil. Bəzi silahlı birləşmələr xarici qüvvələri işğalçı hesab edir, bu da daxili sabitləşmə prosesinə mane olur. Qoşunlar çıxarıldıqdan sonra, hökumət rəsmi strukturlardan kənarda fəaliyyət göstərən bütün silahlı qrupların ləğvi üçün aydın bir proqram həyata keçirəcək. Bu proqram bütün qrupların tələbi kimi qiymətləndirilir. Qruplaşma üzvləri silahı yerə qoyduqdan sonra ya rəsmi təhlükəsizlik orqanlarına qoşula, ya da siyasətlə məşğul ola biləcəklər.