Kaliforniyada Azərbaycanın dövlət müstəqilliyinin bərpasının ildönümü qeyd olunub

ABŞ-nin Kaliforniya ştatının Campbell şəhərində Azərbaycanın dövlət müstəqilliyinin bərpasının 34-cü ildönümünə həsr olunan bədii gecə keçirildi. Bu musiqili gecə Şimali Kaliforniya Mədəniyyət Cəmiyyətinin təşkilatçılığı ilə baş tutdu. Tədbirdə Kaliforniyada yaşayan Azərbaycan icmasının fəal üzvləri ilə yanaşı, Azərbaycanın Kaliforniyadakı Baş Konsulluğunun diplomatları da iştirak edirdilər. Çıxışlarda ölkəmizin müstəqillik tarixi geniş müzakirə olundu. Həmçinin, çağdaş Azərbaycanın qurucusu olan ümummilli lider Heydər Əliyevin möhkəm təməllər üzərində qurduğu dövlətdən və onun inkişafından bəhs edildi. Qeyd olundu ki, Azərbaycan bu gün dünyada liderlik edən bir ölkədir. Ölkədə davam edən tərəqqi və uğurlar Prezident İlham Əliyevin rəhbərliyi ilə həyata keçirilir.

Şimali Kaliforniya Mədəniyyət Cəmiyyəti (ŞKMC) 43 ildir ki, fəaliyyət göstərir. Bu cəmiyyət ABŞ-də yaşayan azərbaycanlıların mədəni birliyini möhkəmləndirməyə böyük töhfələr verir. Yubiley tədbiri zəngin bədii proqramı ilə yadda qaldı. Musiqi nömrələri "Sound of Fire" nağara qrupunun ifasında təqdim olundu. Bundan başqa, gənc həmyerlilərimizdən təşkil edilmiş "Neva" musiqi qrupu Azərbaycanın zəngin musiqi irsindən seçilmiş nümunələr səsləndirdi. Gecədə həmçinin Azərbaycan Uşaq Rəqs Ansamblının təqdimatında cəlbedici rəqs kompozisiyaları da nümayiş etdirildi.

Bu gecə Kaliforniyada yaşayan Azərbaycan icması üçün həm tarixi yaddaşın anılması, həm də mədəni birliyin nümayişi baxımından əhəmiyyətli oldu. Mədəniyyət Cəmiyyətinin uzun illər davam edən fəaliyyəti sayəsində ABŞ-dakı Azərbaycan diasporu öz köklərinə bağlılığını göstərir. Tədbirin sonunda Şimali Kaliforniya Mədəniyyət Cəmiyyəti tərəfindən diaspora fəallarına xüsusi sertifikatlar təqdim edildi.