Kanadada ayının hücumu nəticəsində 11 nəfər yaralanıb

Kanadanın qərbində, Vankuverdən təxminən 700 kilometr şimal-qərbdə yerləşən Bella-Kula bölgəsində xoşagəlməz hadisə baş verib. Gəzintidə olan bir qrup məktəbliyə və onların müəlliminə ayı hücum edib. Nəticədə 11 nəfər xəsarət alıb. Hücuma məruz qalanlar 4-cü və 5-ci sinif şagirdlərindən ibarət idi. Hadisə ilə bağlı məlumatı "Daily Record" yayıb.

Zərərçəkənlərdən birinin anası hadisənin dəhşətli təfərrüatlarını danışıb. Onun 10 yaşlı oğlu Alvares heyvana o qədər yaxın olub ki, uşaq hətta ayının yununu hiss edib. Müəllimlərdən biri isə uşaqları qorumaq üçün böyük fədakarlıq edib. Həmin müəllim ayının hücumunun əsas zərbəsini öz üzərinə götürərək şagirdlərin təhlükəsizliyini təmin etməyə çalışıb.

Yaralılar arasında vəziyyəti ağır olanlar var. Məlumata görə, iki nəfərin vəziyyəti ağırdır, digər iki nəfərin vəziyyəti isə kritik olaraq qiymətləndirilir. Hadisə yerinə dərhal polis və vəhşi təbiəti mühafizə xidmətinin əməkdaşları çağırılıb. Onlar hazırda bölgədə lazımi işləri görürlər. Bu hadisə səbəbindən yerli məktəbdə təhlükəsizlik tədbiri olaraq dərslər ləğv edilib.