“Levante”nin gənc futbolçusu “Barselona”ya keçə bilər

"Barselona" klubu bu qış heyətinə "Levante"nin gənc hücumçusu Karl Eyonqu qatmaq niyyətindədir. Məlumatlara görə, 22 yaşlı futbolçu özü də Kataloniya nəhənginə qoşulmağa hazırdır.

Oyunçunun istəyinə görə, o, yanvar ayında "Barselona"ya keçməli, lakin mövsümün sonuna qədər icarə əsasında hazırkı komandası olan "Levante"də qalmalıdır. Bu transfer "Barselona"nın gələcək hücum xəttini formalaşdırmaq planında önəmli yer tutur.

Eyonq təkcə "blauqrana"nın maraq dairəsində deyil. İspaniya nəhəngi "Real Madrid"lə yanaşı, İngiltərənin böyük klubları – "Mançester Siti", "Mançester Yunayted" və "Arsenal" da gənc kamerunlu oyunçunu diqqətdə saxlayır. Onun bazar dəyəri hazırda 20 milyon avro təşkil edir.

"Barselona" rəhbərliyi Karl Eyonqu mövsümün sonunda müqaviləsi bitəcək 37 yaşlı təcrübəli hücumçu Robert Levandovskinin gələcək əvəzedicisi kimi qiymətləndirir. Kamerunlu futbolçunun müqaviləsində sərbəst qalma şərtləri qeyd edilib. La Liqa daxilindəki klublar üçün bu məbləğ 30 milyon avro, Premyer Liqa klubları üçün isə 40 milyon avro olaraq müəyyən olunub.

Onun klubla hazırkı müqaviləsi 2029-cu ilin yayına qədərdir. Eyonq bu mövsüm İspaniya liqasında 10 oyuna çıxıb. O, bu görüşlərdə altı qol vurmağı və üç məhsuldar ötürmə etməyi bacarıb. Gənc oyunçu yaxşı statistika ilə çıxış edir.