Leyla Əliyeva Mingəçevirdə şəhid ailəsini ziyarət edib, bir sıra sosial müəssisələrlə tanış olub

Heydər Əliyev Fondunun vitse-prezidenti və IDEA İctimai Birliyinin rəhbəri Leyla Əliyeva Mingəçevirə səfər edib. Bu səfər əsnasında o, ilk olaraq Vətən uğrunda canlarını fəda etmiş Əhmədov qardaşlarının ailəsini ziyarət etdi. Əli və İslam Əhmədov qardaşları Vətən müharibəsi zamanı eyni gündə şəhid olmuşdular.

Leyla Əliyeva şəhidlərin anası Sevinc Əhmədova ilə səmimi söhbət etdi. O, şəhidlərin xatirəsini ehtiramla yad edərək, qəhrəman oğulların həyat yolu, döyüş səfəri, eləcə də ailənin mövcud ehtiyacları ilə maraqlandı. Şəhid qardaşlar Azərbaycan Respublikası Prezidentinin Sərəncamları ilə təltif olunmuşdular. Əli Əhmədov 3-cü dərəcəli "Vətənə xidmətə görə" ordeni, "Vətən uğrunda", "Suqovuşanın azad olunmasına görə" və "Laçının azad olunmasına görə" medalları almışdı. İslam Əhmədov isə eyni ordenlə yanaşı, "Vətən uğrunda", "Cəsur döyüşçü" və "Suqovuşanın azad olunmasına görə" medalları ilə təltif edilmişdi.

Səfər daha sonra şəhərdəki sosial müəssisələrlə tanışlıqla davam etdi. Leyla Əliyeva pensiya yaşında olan şəxslər üçün yaradılmış "Yaşa" mərkəzinə baş çəkdi. Bu mərkəzdə sakinlər fərqli əl işləri, dekorativ-tətbiqi sənət nümunələri ilə məşğul olurlar, onlar üçün mütəmadi olaraq maarifləndirici və mədəni tədbirlər təşkil edilir. O, yaşlılarla söhbət etdi, onların hazırladığı əl işlərinə baxdı və Mərkəzin gələcək fəaliyyət planları haqqında məlumat topladı. Daha sonra Leyla Əliyeva Uşaq Nevroloji Sanatoriyasını ziyarət etdi. Sanatoriyada daimi əsasda 20-yə yaxın uşaq müalicə və reabilitasiya alır. O, balaca pasiyentlərlə maraqlandı, həkim və tibb personalı ilə danışaraq onların işlərinə uğurlar arzuladı. Leyla Əliyeva Sanatoriyaya ayaq və əl reabilitasiyası üçün fərqli avadanlıqlar, o cümlədən robotik reabilitasiya əlcəkləri və terapiya cihazları hədiyyə etdi.

Səfərin mədəniyyət istiqaməti Üzeyir Hacıbəyli adına 1 nömrəli onbirillik musiqi məktəbi oldu. 70 ildən çox tarixi olan bu təhsil ocağı 2011-ci ildən onbirillik musiqi məktəbi kimi fəaliyyət göstərir. Hazırda məktəbdə 600-dən çox şagird təhsil alır. Burada fortepiano, violin, tar, kamança, qarmon, nağara və xanəndəlik kimi ixtisaslar tədris olunur. Leyla Əliyeva tar, kaman, qarmon sinifləri üzrə tədrislə tanış oldu. Ona şagirdlərin fərqli yerli və beynəlxalq müsabiqələrdə uğurlu iştirakları barədə məlumat verildi. Təhsil müəssisəsinə dəstək olaraq 30-dan çox zəruri musiqi aləti – tar, kamança, qarmon, royal, piano və s. hədiyyə edildi. Səfər məktəbin akt zalında şagirdlərin ifasında təqdim olunan konsert proqramı ilə başa çatdı.