Masazırda qadının pul kisəsi oğurlanıb

Abşeron rayonu ərazisində soyğunçuluq hadisəsi baş verib. Masazır qəsəbəsində bir qadına məxsus avtomobildən pul kisəsi açıq talama yolu ilə oğurlanıb. Zərərçəkən polisə müraciət edərək bildirib ki, naməlum şəxs ona aid olan “Hyundai” markalı nəqliyyat vasitəsindən içərisində 1800 manat məbləğində pul olan pul kisəsini götürüb.

Polis əməkdaşları tərəfindən aparılan əməliyyat-axtarış tədbirləri nəticəsində cinayət əməlini törətməkdə şübhəli bilinən şəxs müəyyən edilib. Hadisədə şübhəli bilinən 39 yaşlı E. Qarayev saxlanılıb. Onun avtomobildən pul oğurlaması faktı üzrə araşdırmalar davam etdirilir.

Eyni zamanda, Abşeron rayonunda keçirilən digər tədbir zamanı daha bir oğurluq hadisəsi ilə bağlı şübhəli şəxs tutulub. Xırdalan şəhər sakininin velosipedini oğurlamaqda şübhəli bilinən 35 yaşlı R. Abbasov həbs edilib. Məlum olub ki, R. Abbasov əvvəllər də məhkum olunub. Hazırda hər iki fakt üzrə polis tərəfindən zəruri istintaq hərəkətləri aparılır.