Milli Geyim Evinin rəhbəri Yasamaldakı yanğında dünyasını dəyişənlərdən biri olub

Bakının Yasamal rayonunda yerləşən çoxmərtəbəli yaşayış binasında baş verən yanğın faciə ilə nəticələnib. Bu hadisə nəticəsində 3 nəfər həlak olub. Həyatını itirənlərdən birinin ictimaiyyətə tanınmış şəxs olduğu bildirilir.

Həlak olan şəxs 1977-ci il təvəllüdlü Hümbətova Könül Vəlibəy qızı (Könül Vəlibəyli) idi. Könül Vəlibəyli Bakı Milli Geyim Evinin rəhbəri vəzifəsini tuturdu. Hadisə ilə bağlı təfərrüatlar araşdırılır.

Respublika Təcili və Təxirəsalınmaz Tibbi Yardım Mərkəzinin məlumatına görə, yanğınla bağlı çağırış ünvanına geniş tibbi qüvvələr cəlb edildi. Ümumilikdə 18 təcili tibbi yardım briqadası hadisə yerinə yollanmışdı. Onlar zərər çəkən şəxslərə ilkin tibbi xidmətin göstərilməsinə başladılar. İlkin tibbi yardım 15 nəfərə göstərilib. Bu şəxslərin hamısı tüstüdən zəhərlənmə diaqnozu ilə Kliniki Tibbi Mərkəzə hospitalizasiya edilib.

Qeyd edilib ki, hadisədən sonra Kliniki Tibbi Mərkəzə hospitalizasiya olunanların ümumi sayı 20 nəfərə çatıb. Bu rəqəmə özləri müraciət edən 5 nəfər də daxildir. Həkimlər hospitalizasiya olunan şəxslərə zəruri tibbi xidmətləri göstərməyə davam edirlər. Təəssüf ki, yanğın zamanı həyatını itirən 3 nəfərin isə həkiməqədər ölüm faktı qeydə alınıb.