Naxçıvanın 2026-cı il büdcəsində gəlir mənbələri üzrə 64,12 milyon manat artım olacaq

Dekabrın 5-də Naxçıvan Muxtar Respublikasının 2026-cı il büdcəsi haqqında qanun layihəsinin müzakirəsi məqsədilə Ali Məclis komitələrinin birgə iclası keçirildi. İclas zamanı İqtisadi Siyasət Komitəsinin sədri Emin Şıxəliyev büdcənin əsas parametrləri haqqında məlumat verdi. O qeyd etdi ki, Naxçıvan Muxtar Respublikasının 2026-cı il büdcəsi həm gəlirlər, həm də xərclər üzrə bərabər məbləğdə təsdiqlənəcək. Plana əsasən, büdcə gəlirlərinin və xərclərinin ümumi həcmi 483 milyon 178 min manat təşkil etməlidir.

Naxçıvan Muxtar Respublikasının 2026-cı il büdcə layihəsində maliyyə göstəricilərinin ciddi şəkildə yüksəlməsi nəzərdə tutulur. Gəlir mənbələri üzrə proqnozlara baxdıqda, 2025-ci illə müqayisədə 64 milyon 120 min manat, yəni 30,9 faiz artım müşahidə edilir. Bu maliyyə artımı muxtar respublikanın iqtisadi dayanıqlığını əks etdirir. Bundan əlavə, 2026-cı il üzrə büdcə gəlirləri ilk dəfə olaraq ayrılmış dotasiya məbləğini üstələyib. Bu fakt Naxçıvan iqtisadiyyatının inkişafı baxımından önəmli göstəricidir.

Görüş zamanı Naxçıvan Muxtar Respublikasının Maliyyə naziri Həsən İsmayılov və İqtisadiyyat naziri Kazım Hüseynəliyev də iştirak edərək qanun layihəsi barədə ətraflı məlumatlar verdilər. Müzakirələr yekunlaşdıqdan sonra İqtisadi Siyasət Komitəsinin rəyi oxundu. Sənəd yekdilliklə yeddinci çağırış Naxçıvan Muxtar Respublikası Ali Məclisinin növbəti iclasının gündəliyinə salındı və orada müzakirəyə təqdim edildi.