Ombudsman jurnalist yazı və uşaq rəsm müsabiqələri elan edib

Azərbaycan Respublikasının İnsan Hüquqları üzrə Müvəkkili (Ombudsman) ənənəvi olaraq 10 Dekabr - Beynəlxalq İnsan Hüquqları Günü münasibətilə Jurnalist yazı və Uşaq rəsm müsabiqələrini keçirdiyini elan etdi. Bu yarışmalar Azərbaycan Prezidentinin 28 dekabr 2024-cü il tarixli 432 nömrəli Sərəncamına uyğun təşkil edilir. Həmin Sərəncama əsasən, ölkəmizdə 2025-ci il "Konstitusiya və Suverenlik İli" elan edilib. Buna görə, bu ilki müsabiqələr məhz bu mühüm mövzuya həsr olunub. Jurnalistlər üçün mövzu "Konstitusiya və Suverenlik medianın gözü ilə", uşaqlar üçün isə "Konstitusiya və Suverenlik uşaqların gözü ilə" şəklində müəyyən edilib.

Jurnalist yazı müsabiqəsində iştirak üçün müəllif yazıları ölkədə çıxan hər hansı bir qəzetdə və ya saytda dərc olunmalıdır. İştirakçılar anket doldurmalı (forması Ombudsman Aparatının internet səhifəsində mövcuddur) və müəllifin bir ədəd 4x5 ölçüdə fotoşəklini əlavə etməlidirlər. Uşaq rəsm müsabiqəsində 6-18 yaş arası uşaqlar iştirak edə bilərlər. Rəsmlər A3 formatda işlənməli və mövzuya tam uyğun olmalıdır. Qeyd edilir ki, rəsm əsərləri ideya, işlənmə texnikası və üslub baxımından orijinal olmalı və başqa müsabiqələrə təqdim edilməmiş olmalıdır. Uşaq iştirakçılar da anket doldurmalı və rəsmlə birlikdə 4x5 ölçüdə fotoşəkil təqdim etməlidirlər.

Müsabiqə mövzusuna uyğun olmayan rəsmlər nəzərə alınmayacaqdır. Qalib hesab edilmiş rəsmlər geri qaytarılmır. Digər iştirakçılar müsabiqə başa çatdıqdan sonra 10 gün ərzində öz rəsmlərini geri götürə bilərlər. Həm jurnalist yazıları, həm də uşaq rəsmləri 05 dekabr 2025-ci il saat 18:00-dək Ombudsman Aparatına (Ü.Hacıbəyli küçəsi, 80, Hökumət Evi, IV qapı) təqdim edilməlidir. Müsabiqənin sonunda hər iki nominasiya üzrə qalib gələn iştirakçılar mükafatlandırılacaqlar.