Qərbi Azərbaycan Xronikası: Kurqanlardan çıxan sirlər - bu zirehləri kim geyinirdi?

“Qərbi Azərbaycan Xronikası” layihəsi çərçivəsində “İrsimiz” rubrikasının növbəti buraxılışı hazırlanıb. Bu buraxılış sənətşünaslıq üzrə fəlsəfə doktoru Elçin Əlibəylinin təqdimatında tamaşaçılara çatdırılıb.

Buraxılışda tarix üzrə fəlsəfə doktoru, dosent Səbuhi Əhmədov çıxış edib. O, tunc dövrünün möhtəşəm hərb memarlığından, qədim Azərbaycan döyüşçüsünün müdafiə texnologiyasından və Zəngəzur və Naxçıvan qalalarının gizli hərbi rolundan danışıb. Əhmədov həmçinin Zəngəzurun qala sistemi, qədim Azərbaycan sivilizasiyasının Naxçıvanda tapılan qalxan fraqmentləri, Oğlanqala divarlarının tikinti sirri ilə bağlı maraqlı faktları açıqlayıb. O, şimal sivilizasiyasını qoruyan qalalar haqqında da məlumat verib.

Səbuhi Əhmədov qədim Azərbaycanın hərbi gücünə aydınlıq gətirib. O, Naxçıvanın qədim qalalarını və hərbi əşyalarını misal gətirərək bu əşyaların Amerika arxeoloqlarını necə heyran etdiyini bildirib. Bu tapıntılar Azərbaycanın gücünü göstərir. Doktor Əhmədov tunc dövründə hərb elminin necə qurulmasını ətraflı izah edib.

Qərbi Azərbaycan Xronikası layihəsinin geniş məqsədləri var. Bu layihə tarixi torpaqlarımızın adının yaşadılması və tanıdılması üçün fəaliyyət göstərir. Bundan başqa, layihə azərbaycanlıların ermənilər tərəfindən deportasiyaya məruz qoyulması faktını və həmin ərazilərdə mövcud olmuş, lakin adı silinən toponimləri dünyaya çatdırır. Layihənin əsas hədəfi saysız-hesabsız yeraltı və yerüstü maddi mədəniyyət nümunələrini üzə çıxarmaqdır. Bura qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqlar daxildir.

Nəhayət, layihə həmin ərazinin təmiz oğuz-türk məskənləri olduğunu təsdiq edən faktları dünya ictimaiyyətinə çatdırmağı qarşısına məqsəd qoyub.