Ramiz Rzayev: Demokratik cəmiyyətin əsas təməllərindən biri hüquqi dövlətdir

Hakimiyyət bölgüsü prinsipinin həyata keçirilməsi və hakimiyyət qolları arasında əlaqələrin səmərəli təşkili hüquqi dövlətin vacib tələblərindən biridir.

Azərbaycan Hakimlər İttifaqının sədri Ramiz Rzayev Beynəlxalq Hakimlər Assosiasiyasının 67-ci Baş Assambleyası çərçivəsində "Konstitusiya və Suverenlik İli" nə həsr olunmuş beynəlxalq konfransda çıxış edib.

“Məhkəmə hakimiyyəti və dövlətin digər iki qolu arasında münasibətlər” mövzusunda keçirilən konfransda Rzayev demokratik cəmiyyətin əsas təməllərindən birinin hüquqi dövlət olduğunu vurğulayıb.

O bildirib ki, hüquqi dövlət quruculuğunda hakimiyyətlərin bölgüsü prinsipinin həyata keçirilməsi əsas şərtdir:

"Şarl Monteskye özünün məşhur “Qanunların ruhu” əsərində qeyd etdiyi kimi, məhkəmə hakimiyyəti qanunvericilik və icra hakimiyyətlərindən ayrılmadığı təqdirdə, heç bir azadlıqdan söz gedə bilməz."

R. Rzayev əlavə edib ki, müasir konstitusion quruluşun fundamental əsaslarından biri dövlət hakimiyyətinin qanunvericilik, icra və məhkəmə qollarına ayrılmasıdır. Bu amil hakimiyyətin təmərküzləşməsinin və ondan sui-istifadənin qarşısını almaq üçün zəruri şərtdir.

Bu bölgü eyni zamanda insan və vətəndaş hüquq və azadlıqlarının, qanunun aliliyinin və demokratiyanın təminatına xidmət edir. Hakimiyyət bölgüsünü təmin edən əsas element isə hər bir hakimiyyət qolunun malik olduğu səlahiyyətlərdir. Məhz müxtəlif hakimiyyət orqanlarına məxsus səlahiyyətlərin bir-birinə olan münasibətindən asılı olaraq hakimiyyət bölgüsünün nə dərəcədə düzgün və möhkəm olduğunu müəyyən etmək mümkündür.