Rövşən Rüstəmov: "TRIPP dəhlizi artan tələbatı qarşılamaq üçün genişləndirilə bilər"

“Beynəlxalq sülh və rifah naminə Tramp Marşrutu” (TRIPP) layihəsi Azərbaycanı Ermənistan üzərindən birbaşa Naxçıvanla, oradan isə Türkiyənin dəmir yolu sistemi ilə birləşdirəcək strateji əhəmiyyətə malikdir. "Azərbaycan Dəmir Yolları" QSC-nin (ADY) sədri Rövşən Rüstəmov "NE Global" nəşrinə verdiyi müsahibədə bu dəhlizin gələcək potensialı haqqında danışıb.

Rüstəmovun sözlərinə görə, Türkiyə artıq 224 kilometrlik dəhlizin öz ərazisindən keçən hissəsinin tikintisinə başlayıb. Bu, layihəyə verilən güclü siyasi iradəni və maliyyə dəstəyini göstərir. Azərbaycanın üzərinə düşən hissədə, yəni 110 kilometrlik Horadiz-Ağbənd dəmir yolu üzərində işlər hazırda davam edir. Layihənin tikintisinə 2021-ci ildə başlanılıb və 2026-cı ilədək tamamlanması planlaşdırılır.

Layihə üzrə işlər yüksək sürətlə irəliləyir. Yuxarı Mərcanlıdan Ağbəndə qədər olan marşrutda - Şükürbəyli, Soltanlı, Qumlaq, Həkəri, Mincivan və Bartaz daxil olmaqla - səkkiz yeni stansiya inşa olunur. ADY sədri qeyd etdi ki, layihələndirmə işlərinin təxminən 85%-i, tikinti-quraşdırma işlərinin isə 68%-i artıq icra edilib. Eyni zamanda, Naxçıvan Muxtar Respublikasında dəmir yolu infrastrukturunun yenidən qurulması və müasirləşdirilməsi üzrə texniki-iqtisadi əsaslandırma sənədi tamamlanıb. Bu mərhələ bitdikdən sonra Naxçıvanda müasir standartlara cavab verən yeni dəmir yolu şəbəkəsinin formalaşması üçün tikintiyə başlanacaq.

R.Rüstəmov bildirdi ki, TRIPP dəhlizi əvvəlcədən gələcəkdə genişləndirmə imkanı nəzərə alınaraq layihələndirilib. İlkin buraxılış qabiliyyəti sabit yük axınını təmin edəcək. Gələcəkdə artan tələbatı qarşılamaq üçün infrastruktur asanlıqla böyüdülə bilər. O düşünür ki, zamanla TRIPP buraxılış qabiliyyəti baxımından Bakı-Tbilisi-Qars xətti ilə rəqabət apara biləcək səviyyəyə çata bilər. TRIPP-in əsas əhəmiyyəti regional şəbəkədə dayanıqlığı və alternativliyi artırmasıdır. Bu dəhliz Azərbaycan üçün bir neçə paralel nəqliyyat dəhlizinin davamlı şəkildə mövcud olmasını təmin edir.