RSXM-də Çinlə seysmologiya sahəsində əməkdaşlıq müzakirə olunub

Çinin Elmlər Akademiyasının Uzaqdan Zondlama və Rəqəmsal Yer İnstitutunun baş katibinin müavini Li Renying AMEA nəzdində Respublika Seysmoloji Xidmət Mərkəzində (RSXM) səfərdə olub. Bu görüşdə tərəflər seysmologiya sahəsində ikitərəfli əlaqələrin inkişaf etdirilməsi yollarını müzakirə ediblər. Çinli qonaq RSXM-nin fəaliyyəti və Azərbaycan alimlərinin seysmik tədqiqatlar sahəsində əldə etdiyi böyük nəticələrlə maraqlandığını bildirib. Səfərin yekununda o, iki ölkə arasında əlaqələri daha da möhkəmləndirmək üçün əməkdaşlıq memorandumunun imzalanması təklifi ilə çıxış edib.

RSXM-nin baş direktoru, professor Qurban Yetirmişli qonağa mərkəzin işi haqqında geniş məlumat verib. Professor Yetirmişli burada aparılan kompleks geofiziki, seysmoloji, geodinamik və geokimyəvi tədqiqatları izah edib. O, həmçinin mərkəzin xarici ölkələrin seysmoloji mərkəzləri və aparıcı universitetləri ilə sıx əməkdaşlıq etdiyini, birgə elmi tədqiqatlar və layihələr həyata keçirdiyini qeyd edib. Baş direktor hazırda Azərbaycanda seysmik tədqiqatların 84 seysmik stansiya vasitəsilə aparıldığını və məlumatların emalında ən müasir proqramların tətbiq edildiyini vurğulayıb.

Professor Qurban Yetirmişli kadr hazırlığı məsələləri və mərkəzdə aparılan elmi tədqiqatların nəticələrinə dair xarici impakt faktorlu jurnallarda nəşr edilən məqalələr haqqında da Li Renyingi məlumatlandırıb. Çin tərəfinin nümayəndəsi bu fəaliyyətin onların marağına səbəb olduğunu, Azərbaycan alimlərinin seysmik tədqiqatlar sahəsində əldə etdikləri nailiyyətlərin yüksək olduğunu bildirib. O, ikitərəfli əlaqələrin inkişaf etdirilməsi üçün əməkdaşlıq memorandumunun imzalanmasının müsbət töhfələr verəcəyinə ümid etdiyini dilə gətirib.

Görüşdə kadrların qarşılıqlı təcrübə mübadiləsi və tərəfləri maraqlandıran digər məsələlər ətrafında da fikir mübadiləsi aparılıb. Müzakirələrdə RSXM-nin baş direktorunun elmi işlər üzrə müavini, dosent Rauf Muradov və "Beynəlxalq əlaqələr" şöbəsinin müdiri Telman Cəfərov da iştirak ediblər. Sonda çinli qonağa xatirə hədiyyəsi təqdim olunub.